27 Sentyabr Azərbaycan xalqının müasir tarixində mühüm siyasi və hərbi hadisənin başlanğıcı kimi xüsusi yer tutur. Həmin gün başlayan Vətən müharibəsi ölkəmizin ərazi bütövlüyünün bərpası ilə nəticələndi. Azərbaycan Ordusu 44 gün ərzində döyüş meydanında böyük iradə və peşəkarlıq nümayiş etdirdi. Şəhidlərimizin qəhrəmanlığı və qazilərimizin fədakarlığı bu Zəfərin əsas mənəvi dayaqlarından oldu. Prezident İlham Əliyevin rəhbərliyi ilə həyata keçirilən siyasət Azərbaycanın hərbi və siyasi imkanlarının səfərbər olunmasına şərait yaratdı. Bu gün Anım Günü həm şəhidlərimizin xatirəsinə ehtiram, həm də onların bizə miras qoyduğu Vətən sevgisinin ifadəsidir.

İşğal dövründə Azərbaycanın şəhər və kəndləri dağıdılmış, tarixi-mədəni irsə ciddi zərər vurulmuşdu. Azərbaycan xalqı üç onillik ərzində öz torpaqlarının azad ediləcəyi günü səbirlə gözləmişdi. Beynəlxalq hüquq Azərbaycan ərazilərinin işğal altında saxlanılmasını qəbul etmirdi və BMT Təhlükəsizlik Şurasının müvafiq qətnamələri də qəbul edilmişdi. Buna baxmayaraq, uzun illər ərzində həmin sənədlərin icrası istiqamətində real nəticə əldə olunmadı. 2020-ci ilin sentyabrında Ermənistanın növbəti hərbi təxribatı Azərbaycanın özünümüdafiə hüququ çərçivəsində hərbi əməliyyatlara başlamasına səbəb oldu. Azərbaycan Ordusunun həyata keçirdiyi uğurlu əməliyyatlar nəticəsində işğal faktına son qoyulması istiqamətində həlledici addımlar atıldı.

Müharibə zamanı Füzuli, Cəbrayıl, Zəngilan, Qubadlı və digər ərazilərin azad edilməsi xalqımızın Zəfərə olan inamını gücləndirdi. Şuşanın azad edilməsi isə hərbi əməliyyatların taleyinə ciddi təsir göstərən mühüm hadisə oldu. Azərbaycan Ordusunun qarşısında Ermənistanın müqavimət imkanları getdikcə zəiflədi. Nəticədə 10 noyabr 2020-ci il tarixli üçtərəfli Bəyanatla müharibə dayandırıldı. Həmin razılaşmaya əsasən Ağdam, Kəlbəcər və Laçın rayonları Azərbaycana qaytarıldı. Sonrakı mərhələdə 2023-cü ilin sentyabrında həyata keçirilən antiterror tədbirləri Azərbaycanın suverenliyinin tam bərpasını təmin etdi.

Bu gün Qarabağ və Şərqi Zəngəzurda aparılan bərpa işləri Zəfərin davamlı nəticələrini göstərir. İşğaldan azad olunmuş ərazilərdə müasir infrastruktur yaradılır və yeni yaşayış məntəqələri salınır. İnsanların öz doğma torpaqlarına qayıtması bu böyük tarixi hadisənin ən mühüm nəticələrindən biridir. Prezident İlham Əliyevin rəhbərliyi ilə həyata keçirilən quruculuq siyasəti azad edilmiş ərazilərin gələcək inkişafına geniş imkanlar yaradır. Şəhidlərin xatirəsinin əbədiləşdirilməsi də bu prosesin mənəvi tərəfini təşkil edir. 27 Sentyabr xalqımıza Zəfərin böyük qurbanlar hesabına əldə edildiyini bir daha xatırladır.

Anar Xəlilov – Şuşa Rayon Statistika İdarəsinin rəisi, YAP Şuşa rayon təşkilatının 10 saylı ərazi təşkilatının sədr müavini