İşğaldan azad olunmuş ərazilərdə həyata keçirilən genişmiqyaslı quruculuq işləri Azərbaycanın güclü dövlət modelinin praktik təzahürüdür. Qarabağ və Şərqi Zəngəzurda icra olunan layihələr postmünaqişə mərhələsinin əsas prioritetlərini müəyyənləşdirir. Dövlət bu prosesi öz daxili imkanları hesabına həyata keçirərək iqtisadi müstəqilliyini bir daha təsdiqləyir.

Uzun illər ərzində dağıdılmış yaşayış məntəqələri bu gün müasir standartlara uyğun şəkildə yenidən qurulur. Ağıllı kənd və ağıllı şəhər konsepsiyaları tətbiq edilir, alternativ enerji layihələri reallaşdırılır. Bu yanaşma regionun dayanıqlı inkişafına xidmət edir.

“Böyük Qayıdış” proqramı çərçivəsində sakinlərin mərhələli şəkildə doğma torpaqlarına köçürülməsi təmin olunur. İnsanların təhlükəsiz, rahat və firavan şəraitdə yaşaması üçün hərtərəfli sosial infrastruktur yaradılır. Məktəblər, tibb ocaqları və mədəniyyət mərkəzləri yeni həyatın əsasını təşkil edir.

Postmünaqişə dövründə təhlükəsizlik və sülh konsepsiyası xüsusi önəm daşıyır. Əldə olunan hərbi-siyasi nəticələr regionda yeni reallıqlar formalaşdırıb. Bu reallıqlar Azərbaycanın suveren hüquqlarının tam şəkildə təmin olunduğunu göstərir.

Nəticə etibarilə, həyata keçirilən strategiya tarixi ədalətin təmininə və uzunmüddətli inkişafın qurulmasına xidmət edir. Azad olunmuş torpaqlarda həyatın yenidən canlanması milli birliyin və güclü dövlətçilik ənənələrinin bariz nümunəsidir.

Rəfail Məmmədov

“Əməkdar müəllim”, YAP Şuşa rayon təşkilatının fəal üzvü