Azərbaycanın uzunmüddətli inkişaf strategiyasında gənclər həlledici amil kimi çıxış edir. Hər bir xalqın gələcəyini müəyyən edən əsas faktor maddi resurslardan daha çox, insan potensialıdır və bu potensialın daşıyıcıları məhz gənc nəsildir. Bilikli, milli-mənəvi dəyərlərə bağlı, dünyagörüşü geniş və vətəndaş məsuliyyəti daşıyan gənclik dövlətin dayanıqlı tərəqqisini təmin edən əsas sütunlardan sayılır. Cəmiyyətin dinamizmi, innovativliyi və beynəlxalq rəqabət qabiliyyəti birbaşa olaraq gənclərin fəallığı və təşəbbüskarlığı ilə bağlıdır. Bu səbəbdən gənclərə göstərilən diqqət sırf sosial yanaşma deyil, strateji düşüncənin mühüm tərkib hissəsidir.

Ümummilli Lider Heydər Əliyevin gənclərə dair baxışı bu siyasətin ideoloji əsasını formalaşdırdı. Onun gəncliyi dövlətin gələcək inkişafının aparıcı qüvvəsi kimi dəyərləndirməsi ölkədə yeni yanaşmanın əsasını qoydu. Bu konsepsiya çərçivəsində gənclərin təhsilinə, məşğulluğuna, sosial təminatına və vətənpərvərlik ruhunda yetişdirilməsinə xüsusi önəm verildi. Dövlət proqramları sistemli şəkildə həyata keçirildi və gənclər cəmiyyət həyatının fəal subyektinə çevrildi.

Gənclərlə bağlı siyasətin institusional səviyyədə qurulması mühüm mərhələ oldu. Müvafiq dövlət qurumlarının yaradılması, gənclər forumlarının təşkili, dialoq platformalarının formalaşdırılması onların fikir və təşəbbüslərinin nəzərə alınmasına şərait yaratdı. Gənclər Gününün təsis edilməsi isə dövlətin bu sahəyə verdiyi önəmin simvolik və siyasi ifadəsinə çevrildi. Qanunvericilik bazasının möhkəmləndirilməsi, xüsusi proqramların qəbul olunması gənclərin inkişafına hüquqi təminat yaratdı.

Sonrakı dövrdə gənclərin sosial fəallığını artıran yeni mexanizmlər tətbiq olundu. “Gənclər ili” çərçivəsində bölgələrdə layihələr genişləndirildi, “Gənclər evi” mərkəzləri yaradıldı və onların yaradıcılıq imkanlarının reallaşdırılması üçün mühit formalaşdırıldı. Gənclər Fondu vasitəsilə yüzlərlə təşəbbüs maliyyələşdirildi, innovativ ideyalar dəstəkləndi, karyera inkişafı üçün proqramlar həyata keçirildi. Könüllülük hərəkatının genişlənməsi isə gənclərdə sosial məsuliyyət və fəal vətəndaşlıq mövqeyini daha da gücləndirdi.

Təhsil sahəsində aparılan siyasət gənclər strategiyasının əsas istiqamətlərindən biri olaraq qalır. Xaricdə təhsil proqramları minlərlə gəncin aparıcı universitetlərdə oxumasına imkan yaradıb və bu proses yüksək ixtisaslı kadrların hazırlanmasına xidmət edir. Eyni zamanda, idman infrastrukturlarının qurulması, sağlam həyat tərzinin təşviqi və beynəlxalq yarışlarda əldə edilən uğurlar fiziki inkişafın dövlət səviyyəsində dəstəkləndiyini göstərir. Vətən müharibəsi zamanı gənclərin nümayiş etdirdiyi birlik və fədakarlıq isə bu siyasətin mənəvi nəticəsini aydın şəkildə ortaya qoydu.

Ümumilikdə, Azərbaycanda həyata keçirilən gənclər siyasəti ayrı-ayrı təşəbbüslərlə məhdudlaşmır, kompleks və məqsədyönlü inkişaf modelini təşkil edir. Təhsil, sosial fəallıq, innovasiya, vətənpərvərlik və sağlam həyat tərzi bir sistem daxilində birləşdirilərək gələcəyin güclü insan kapitalı formalaşdırılır. Bu gün yetişən savadlı, yaradıcı və məsuliyyətli gənclik isə ölkənin sabahına olan inamın ən möhkəm təminatıdır.

İlham Həsənov

YAP Şuşa rayon təşkilatının 26 saylı ərazi partiya təşkilatının sədri