İşğaldan azad edilmiş Azərbaycan torpaqlarında həyata keçirilən yenidənqurma prosesi dövlətimizin uzunmüddətli inkişaf siyasətinin ən mühüm istiqamətlərindən birini təşkil edir. Bu prosesdə Qubadlı rayonu öz coğrafi mövqeyi, zəngin təbii sərvətləri və geniş iqtisadi imkanları ilə xüsusi yer tutur. 2020-ci il oktyabrın 25-də Qubadlı şəhərinin azad edilməsi rayonun gələcək taleyində əsaslı dönüş yaratmışdır. Prezident İlham Əliyevin rəhbərliyi ilə qazanılmış tarixi Zəfər nəticəsində bölgədə uzun illər pozulmuş sosial və iqtisadi həyatın bərpası üçün yeni şərait formalaşmışdır. Azərbaycan Ordusunun hərbi əməliyyatlarda nümayiş etdirdiyi yüksək döyüş hazırlığı və qəhrəmanlıq xalqımızın milli qürur mənbəyinə çevrilmişdir. Qubadlının azadlığı hərbi Qələbənin nəticələrinin insanların gündəlik həyatında əks olunacağı yeni inkişaf mərhələsinin başlanğıcını qoymuşdur.

Rayonun işğaldan əvvəlki həyatı kənd təsərrüfatı, yerli təsərrüfat əlaqələri və zəngin mədəni ənənələrlə səciyyələnirdi. Lakin 1993-cü il avqustun 31-də baş vermiş işğal nəticəsində bu inkişaf prosesinə ağır zərbə vurulmuşdur. Minlərlə sakin doğma torpaqlarını tərk etməyə məcbur olmuş, yaşayış məntəqələri və təsərrüfat infrastrukturu dağıdılmışdır. Uzun müddət rayon ərazisində normal iqtisadi fəaliyyətin aparılmaması yerli istehsal və məşğulluq imkanlarını aradan qaldırmışdır. İşğaldan sonra qarşıda duran əsas vəzifələrdən biri də həmin iqtisadi potensialın müasir tələblərə uyğun şəkildə yenidən formalaşdırılmasıdır. Qubadlının əlverişli təbii şəraiti və əkinçilik ənənələri bu istiqamətdə geniş imkanların mövcud olduğunu göstərir.

Qubadlı şəhərinin 2040-cı ilədək inkişafına dair Baş plan rayon mərkəzinin gələcək simasının formalaşdırılmasına kompleks yanaşmanı əks etdirir. Şəhərdə ilk yaşayış məhəlləsinin tikintisinə başlanılması əhalinin mərhələli şəkildə məskunlaşması üçün mühüm addımdır. Nəzərdə tutulan 176 mənzil doğma yurdlarına qayıdacaq ailələrin yaşayış ehtiyaclarının təmin edilməsinə xidmət edəcəkdir. Mahruzlu və Zilanlı kəndlərində həyata keçirilən tikinti işləri kənd yaşayışının bərpasına və yerli icmaların yenidən formalaşmasına şərait yaradacaqdır. Müasir avtomobil yollarının salınması təsərrüfat məhsullarının daşınmasını asanlaşdırmaqla yanaşı, müxtəlif yaşayış məntəqələri arasında əlaqələrin inkişafına da təkan verəcəkdir. Yaşayış, nəqliyyat və sosial infrastrukturun qarşılıqlı əlaqədə inkişaf etdirilməsi Qubadlının iqtisadi potensialından daha səmərəli istifadə olunmasına imkan yaradacaqdır.

Qubadlı şəhəri günü xalqımızın tarixi Qələbəsini yaşatmaqla yanaşı, azad edilmiş torpaqlarda aparılan quruculuq işlərinin əhəmiyyətini də diqqət mərkəzinə gətirir. Prezident İlham Əliyevin 2023-cü il iyulun 31-də imzaladığı Sərəncamla oktyabrın 25-nin əlamətdar gün kimi müəyyənləşdirilməsi Qubadlının Azərbaycan tarixində tutduğu mövqeyin ifadəsidir. Böyük Qayıdış çərçivəsində görülən işlər sakinlərin doğma torpaqlarında təhlükəsiz və rahat həyat qurmasını başlıca məqsəd kimi qarşıya qoyur. Kənd təsərrüfatının bərpası, sahibkarlıq fəaliyyətinin genişləndirilməsi və yeni məşğulluq imkanlarının yaradılması bu məqsədin həyata keçirilməsində xüsusi rol oynayacaqdır. Qubadlının yenidən canlanması işğalın ağır nəticələrinin aradan qaldırılması ilə yanaşı, gələcək nəsillər üçün daha müasir yaşayış mühitinin formalaşdırılması deməkdir. Rayonun inkişaf istiqamətində atılan hər bir addım Azərbaycanın tarixi Zəfərdən sonra quruculuq və tərəqqi yolunda inamla irəlilədiyini nümayiş etdirir.

Gülsarə Abbasova
Respublikanın “Əməkdar mədəniyyət işçisi”, Şuşa Rayon Mərkəzləşdirilmiş Kitabxana Sisteminin direktoru,YAP Şuşa rayon təşkilatının 32 saylı ərazi partiya təşkilatının sədr müavini