Dövlətin ərazi bütövlüyünün bərpası sosial siyasətin qarşısında yeni vəzifələr yaradıb. Qarabağ və Şərqi Zəngəzurda yaşayış məntəqələrinin yenidən qurulması həmin vəzifələrin əsas istiqamətlərindəndir. Yeni məktəblərin, xəstəxanaların və yaşayış komplekslərinin inşası əhalinin qayıdışı üçün vacib şərait yaradır. Bu layihələr yalnız fiziki infrastrukturun deyil, sosial həyatın da bərpasını nəzərdə tutur. Böyük Qayıdış prosesi bu baxımdan genişmiqyaslı sosial proqram xarakteri daşıyır.

2020-ci il müharibəsindən sonra azad edilmiş ərazilərdə yeni inkişaf modelinin formalaşdırılması gündəmə gəldi. 2023-cü ilin sentyabr hadisələrindən sonra bu proses Azərbaycanın bütün Qarabağ ərazisinə şamil olunan yeni idarəçilik mərhələsinə keçdi. Prezident İlham Əliyevin Sərəncamında 20 sentyabrın Dövlət Suverenliyi Günü elan edilməsi həmin hadisələrin dövlətçilik baxımından əhəmiyyətini təsbit etdi. Suverenliyin bərpası ilə bərpa-quruculuq işləri arasında birbaşa sosial əlaqə yarandı.

Keçmiş məcburi köçkünlərin qayıdışı prosesin humanitar tərəfini təşkil edir. İnsanların doğma kənd və şəhərlərinə qayıtması uzun illər davam etmiş həsrətin aradan qalxmasına şərait yaradır. Qayıdış üçün yaşayış evləri ilə yanaşı, məktəb, tibb və xidmət obyektlərinin yaradılması da vacibdir. Buna görə Qarabağın bərpası yalnız tikinti layihələri toplusu kimi qiymətləndirilə bilməz. Bu proses bütöv yaşayış mühitinin yenidən formalaşdırılmasını əhatə edir.

Kamalə Səfərova

Şuşa Mərkəzi Rayon Xəstəxanası PHŞ-nin direktoru, YAP Şuşa rayon təşkilatının 24 saylı ərazi partiya təşkilatının sədri