Xocalı Soyqırımı Memorialının açılışı Azərbaycan xalqı üçün tarixi və mənəvi əhəmiyyətə malikdir. Dövlət başçısı qeyd etdi ki, iki il əvvəl xocalılılarla birlikdə kompleksin təməli qoyulmuşdur. Bu abidənin məhz Xocalıda ucalması xalqın yaddaşının qorunması və tarixi ədalətin təmin olunması baxımından mühüm addımdır.

Prezident çıxışında vurğuladı ki, beynəlxalq təşkilatlar və aparıcı ölkələr bir vaxtlar Xocalı faciəsinə biganə yanaşırdılar. Ermənistanın törətdiyi qanlı cinayəti ört-basdır etməyə çalışırdılar. Lakin Azərbaycan öz haqq səsini ucaltmaqla tarixi ədaləti təmin etdi və bu istiqamətdə ardıcıl diplomatik və hərbi tədbirlər həyata keçirildi.

Həmçinin Xocalı faciəsinin dünya ictimaiyyətinə çatdırılması istiqamətində Heydər Əliyev Fondu mühüm rol oynayıb. Fondun vitse-prezidenti Leyla Əliyevanın təşəbbüsü ilə aparılan kampaniya çərçivəsində beynəlxalq tədbirlər, nəşrlər və təqdimatlar həyata keçirilib. Bunun nəticəsi olaraq, artıq bir çox ölkələr faciəni soyqırımı kimi tanıyıb.

2020-ci ilin 44 günlük Vətən müharibəsi və 2023-cü ilin antiterror əməliyyatları Azərbaycan dövlətinin gücünü nümayiş etdirdi. Torpaqlarımız işğaldan azad edildi, separatçı elementlər məhv edildi və dövlət suverenliyi tam təmin olundu. Bu, xalqın birliyi və Silahlı Qüvvələrin peşəkarlığı sayəsində mümkün oldu.

Memorialın açılışı həm milli yaddaşın qorunmasına, həm də gələcək nəsillərə tarixi dərs verməyə xidmət edir. Bu abidə xalqımızın həm hüznünü, həm də qürurunu ifadə edən tarixi simvol kimi qalacaq.

Anar Xəlilov

Şuşa Rayon Statistika İdarəsinin rəisi, YAP Şuşa rayon təşkilatının 10 saylı ərazi təşkilatının Sədr müavini