Şuşanın coğrafi mövqeyi onun tarixində mühüm rol oynamışdır. Şəhərin yüksək ərazidə yerləşməsi və mürəkkəb relyefi azadlıq uğrunda aparılan döyüşlərdə də ciddi amil olmuşdur. Azərbaycan hərbçiləri qarşıya çıxan çətinlikləri qətiyyətlə aşmışlar. 8 Noyabr – Şuşa Şəhəri Günü həmin əzmin nəticəsini yaşadan tarixdir.
Şuşa əməliyyatı hərbi hazırlığın insan iradəsi ilə birləşdiyi nümunələrdəndir. Döyüş tapşırığının yerinə yetirilməsi əsgər və zabitlərdən böyük fiziki və mənəvi güc tələb edirdi. Onların Vətənə bağlılığı və qarşılıqlı etimadı bu şəraitdə mühüm dayaq oldu. Prezident, Ali Baş Komandan İlham Əliyevin rəhbərliyi ilə Azərbaycan Ordusu şəhəri işğaldan azad etdi.
Bu Qələbə cəmiyyətimizdə öz gücünə inamı daha da artırdı. Şuşanın azadlığı haqqında xəbər insanların yaddaşına ömürlük həkk olundu. Həmin sevincin arxasında döyüşçülərimizin ağır zəhməti və verdiyimiz itkilər dayanırdı. Buna görə bayram duyğusu şəhidlərin xatirəsinə ehtiramla birlikdə yaşanmalıdır.
Şuşanın bugünkü dirçəlişi döyüş meydanında qazanılan nəticənin davamıdır. Şəhərdə aparılan bərpa işləri azadlığın gələcəyə çevrilməsinə xidmət edir. Şuşa Şəhəri Günündə bu tarixi gənclərə anlatmaq onların məsuliyyət hissini gücləndirə bilər. Şuşaya yüksələn əsgərin əzmi gələcəkdə ölkəmizə xidmət edən hər kəs üçün örnəkdir.
Zeybək Cəfərov
YAP Şuşa təşkilatının fəalı, Qarabağ Regional Gənclər və İdman İdarəsinin Şuşa rayonu üzrə gənclər və idman sektorunda baş məsləhətçi
