Yeni Azərbaycan Partiyasının VIII Qurultayı Azərbaycanın ictimai-siyasi həyatında xüsusi əhəmiyyət daşıyan hadisələrdən biri kimi qiymətləndirilir. Bu qurultay ölkəmizin ərazi bütövlüyünün və suverenliyinin tam bərpa olunmasından sonra keçirilən ilk belə tədbir olması ilə seçilir. Prezident İlham Əliyevin çıxışı Azərbaycanın son onilliklər ərzində keçdiyi mürəkkəb və şərəfli inkişaf yolunun əsas mərhələlərinə işıq saldı. Çıxışda həm ölkənin qazandığı tarixi Zəfərlər, həm də qarşıdakı dövrün əsas vəzifələri diqqətə çatdırıldı. Dövlət başçısı siyasi sabitliyin, milli həmrəyliyin və güclü dövlətçilik ənənələrinin əhəmiyyətini xüsusi vurğuladı. Qurultayın keçirildiyi yeni şərait Azərbaycanın siyasi tarixində fərqli mərhələnin başlandığını göstərdi. Bu baxımdan, tədbir yalnız partiyanın daxili fəaliyyəti ilə bağlı deyil, ölkənin gələcək inkişaf istiqamətləri baxımından da mühüm platforma oldu.

VIII Qurultayın əsas xüsusiyyətlərindən biri onun Azərbaycanın tarixi Zəfərindən sonra keçirilməsidir. 2020-ci ildə əldə edilmiş qələbə ölkəmizin hərbi gücünü və siyasi iradəsini bütün dünyaya nümayiş etdirdi. 2023-cü ilin sentyabrında həyata keçirilən antiterror tədbirləri isə suverenliyin ölkənin bütün ərazisində bərpasını təmin etdi. Beləliklə, uzun illər davam edən işğal və separatizm problemi Azərbaycanın ərazi bütövlüyü çərçivəsində həllini tapdı. Prezident İlham Əliyevin çıxışında 8 Noyabr və 20 Sentyabr tarixlərinin Azərbaycanın müasir tarixində xüsusi yer tutduğu qeyd edildi. Hər iki hadisə dövlətin milli məqsədlərə çatmaq üçün ardıcıl və prinsipial siyasət apardığını göstərdi. Bu Zəfərlər Azərbaycanın siyasi tarixində yeni səhifə açmaqla yanaşı, xalqın özünəinamını da daha da gücləndirdi.

Azərbaycanın qələbəsinə aparan yol uzunmüddətli və məqsədyönlü dövlət siyasətinin nəticəsi idi. Bu proses yalnız hərbi hazırlıqla məhdudlaşmırdı, çünki diplomatik fəaliyyət də mühüm istiqamətlərdən biri olmuşdur. Ölkəmiz illər ərzində beynəlxalq platformalarda öz mövqeyini əsaslandırmaq və həqiqətləri dünya ictimaiyyətinə çatdırmaq üçün ardıcıl fəaliyyət göstərdi. Eyni zamanda, Azərbaycanın iqtisadi imkanlarının genişləndirilməsi güclü ordunun formalaşdırılması üçün mühüm zəmin yaratdı. Dövlətin hərbi potensialının artırılması milli təhlükəsizliyin əsas dayaqlarından birinə çevrildi. Xalqın dövlət ətrafında sıx birləşməsi isə bütün bu istiqamətləri vahid məqsəd ətrafında birləşdirdi. Nəticədə siyasi, iqtisadi, diplomatik və hərbi amillərin vəhdəti tarixi Zəfərin əldə olunmasına şərait yaratdı.

Qurultayda Yeni Azərbaycan Partiyasının yaranmasının Azərbaycanın siyasi həyatındakı roluna da geniş qiymət verildi. Partiyanın 1992-ci ildə mürəkkəb ictimai-siyasi şəraitdə yaradılması ölkədə sabitlik və güclü dövlətçilik istəyinin ifadəsi kimi xarakterizə olunur. Həmin dövrdə Azərbaycan ciddi siyasi böhran, iqtisadi çətinliklər və hərbi təhlükələrlə qarşı-qarşıya idi. Belə bir şəraitdə Heydər Əliyevin siyasi nüfuzu ətrafında insanların birləşməsi mühüm tarixi hadisəyə çevrildi. Partiyanın yaranması ölkədə yeni siyasi xəttin formalaşmasına təsir göstərdi.Ümummilli Lider Heydər Əliyevin siyasi hakimiyyətə qayıdışı ilə dövlətçilik institutlarının möhkəmləndirilməsi istiqamətində mühüm addımlar atıldı. Sonrakı illərdə həmin siyasi kurs Azərbaycanın iqtisadi və siyasi gücünün artırılmasına xidmət etdi.

Prezident İlham Əliyevin rəhbərliyi ilə həyata keçirilən siyasət əvvəlki mərhələdə yaradılmış dövlətçilik təməllərinin yeni dövrün tələblərinə uyğun inkişaf etdirilməsini təmin etdi. Ölkənin iqtisadi potensialının artırılması sosial və hərbi layihələrin həyata keçirilməsi üçün geniş imkanlar yaratdı. Azərbaycanın beynəlxalq əlaqələrinin genişlənməsi onun regional və qlobal səviyyədə mövqeyini möhkəmləndirdi. Enerji layihələri ölkənin iqtisadi imkanlarını artırmaqla yanaşı, Azərbaycanın beynəlxalq əhəmiyyətini də yüksəltdi. Nəqliyyat dəhlizlərinin inkişaf etdirilməsi isə ölkəmizin regionlararası əlaqələrdə rolunu daha da gücləndirdi. Bütün bu proseslər Azərbaycanın müstəqil siyasət yürütmək imkanlarını genişləndirdi. Beləliklə, dövlətin hərtərəfli güclənməsi sonrakı tarixi nailiyyətlərin mühüm əsasına çevrildi.

VIII Qurultayda yeni geosiyasi reallıqların yaratdığı imkanlar və çağırışlar da ön plana çəkildi. Müasir dünyada müharibələrin və qarşıdurmaların artması dövlətlərin təhlükəsizlik məsələlərinə daha həssas yanaşmasını zəruri edir. Azərbaycan da bu şəraitdə öz təhlükəsizliyini təmin etməklə yanaşı, milli maraqlarını beynəlxalq müstəvidə qorumağa çalışır. Prezident İlham Əliyevin çıxışında ideoloji təhlükəsizliyin fiziki təhlükəsizlik qədər əhəmiyyətli olduğu xüsusi vurğulandı. Təhsil, savadlılıq və vətənpərvərlik cəmiyyətin ideoloji təxribatlardan qorunmasının əsas vasitələri kimi təqdim edildi. Bu yanaşma müasir informasiya mühitində milli düşüncənin qorunmasının vacibliyini göstərir. Dövlətin qarşısında dayanan əsas vəzifələrdən biri də gələcək nəsillərin güclü dövlətçilik ruhunda formalaşdırılmasıdır.

Qurultay Azərbaycanın qarşısında yeni inkişaf mərhələsinin dayandığını nümayiş etdirdi. Qarabağın və Şərqi Zəngəzurun bərpası bu mərhələnin əsas istiqamətlərindən biri kimi müəyyənləşir. Böyük Qayıdış proqramı işğaldan azad edilmiş ərazilərin yenidən qurulmasını və insanların doğma torpaqlarına qayıdışını təmin edən genişmiqyaslı layihədir. Bununla yanaşı, nəqliyyat və enerji layihələrinin genişləndirilməsi Azərbaycanın iqtisadi imkanlarını daha da artıracaq. Ölkənin tranzit potensialının yüksəldilməsi yeni gəlir mənbələrinin və iş yerlərinin yaranmasına şərait yaradacaq. YAP üzvlərinin qarşıdakı vəzifələrin həyata keçirilməsində fəal iştirakı da xüsusi əhəmiyyət daşıyır. Buna görə VIII Qurultay həm keçmiş nailiyyətlərin qiymətləndirilməsi, həm də gələcəyə dair siyasi istiqamətlərin müəyyənləşdirilməsi baxımından mühüm hadisədir.

Təvəkkül Əliyev
“Əməkdar müəllim”, YAP Şuşa rayon təşkilatının sədri