Azərbaycanın iqtisadi qüdrətinin artması ölkənin bütün sahələrdə inkişafına əlverişli şərait yaradır. Bu inkişafın mühüm istiqamətlərindən biri kənd təsərrüfatıdır. Aqrar sektor həm məşğulluğun artırılmasında, həm də regionların inkişafında əhəmiyyətli rol oynayır. Son illərdə həyata keçirilən dövlət proqramları bu sahəyə yeni dinamika qazandırmışdır. Nəticədə kənd təsərrüfatı ölkə iqtisadiyyatının vacib sütunlarından birinə çevrilmişdir.

Mayın 25-də Prezident İlham Əliyevin sədrliyi ilə keçirilən müşavirədə aqrar sektorun mövcud vəziyyəti geniş müzakirə olunmuşdur. Prezident İlham Əliyev dövlət dəstəyinin kənd təsərrüfatının inkişafında mühüm əhəmiyyət daşıdığını qeyd etmişdir. Fermerlərə göstərilən maliyyə və texniki yardımlar istehsalın artmasına müsbət təsir göstərir. Xüsusilə subsidiyalar və güzəştli kreditlər kənd təsərrüfatı məhsullarının həcminin yüksəlməsinə imkan yaratmışdır. Bu tədbirlər kənd əhalisinin sosial rifahına da müsbət təsir göstərmişdir.

Müşavirədə ərzaq təhlükəsizliyi məsələləri də əsas mövzulardan biri olmuşdur. Qlobal miqyasda baş verən siyasi və iqtisadi proseslər ərzaq təminatının əhəmiyyətini daha da artırır. Bu baxımdan daxili istehsal potensialının gücləndirilməsi strateji vəzifə kimi müəyyənləşdirilmişdir. Buğda istehsalında özünütəminetmə səviyyəsinin artırılması istiqamətində yeni addımların atılması nəzərdə tutulur. Digər kənd təsərrüfatı məhsulları üzrə əldə olunan uğurlar isə ölkənin imkanlarını nümayiş etdirir.

Prezident İlham Əliyev aqrar sahədə innovativ texnologiyaların tətbiqinin vacibliyini xüsusi vurğulamışdır. Müasir suvarma sistemlərinin qurulması və rəqəmsal texnologiyaların istifadəsi məhsuldarlığın yüksəlməsinə xidmət edir. Torpaq ehtiyatlarının daha səmərəli idarə olunması üçün elektron xəritələrin hazırlanması mühüm əhəmiyyət daşıyır. Süni intellekt və peyk texnologiyaları kənd təsərrüfatında yeni imkanlar açır. Bütün bunlar Azərbaycanın aqrar sektorunun gələcək inkişaf perspektivlərini daha da genişləndirir.

Zeybək Cəfərov

YAP Şuşa təşkilatının fəalı,Qarabağ Regional Gənclər və İdman İdarəsinin Şuşa rayonu üzrə gənclər və idman sektorunda Baş məsləhətçi