Enerji sahəsində strateji tərəfdaşlıq

Müasir beynəlxalq münasibətlər sistemində enerji təhlükəsizliyi dövlətlərin iqtisadi və siyasi sabitliyi üçün mühüm amillərdən biri hesab olunur. Bu baxımdan Azərbaycan qlobal enerji bazarında etibarlı tərəfdaş kimi tanınır. Xəzər regionunun zəngin enerji ehtiyatlarına malik olan ölkə bu resursların beynəlxalq bazarlara çıxarılması istiqamətində bir sıra mühüm layihələr həyata keçirib.

Azərbaycanın təşəbbüsü ilə reallaşdırılan enerji layihələri Avropa ilə əməkdaşlığın inkişafına ciddi töhfə verib. Xüsusilə Cənub Qaz Dəhlizi kimi iri layihələr Avropanın enerji təhlükəsizliyinin təmin olunmasında mühüm rol oynayır. Bu layihə vasitəsilə Azərbaycan qazı Avropa bazarlarına çatdırılır və qitənin enerji mənbələrinin diversifikasiyasına töhfə verir.

Bakıda keçirilən görüş zamanı Prezident İlham Əliyev Azərbaycanın Avropa üçün etibarlı enerji tərəfdaşı olduğunu bir daha vurğuladı. O qeyd etdi ki, ölkənin enerji resurslarının Avropa bazarlarına çatdırılması həm iqtisadi, həm də geosiyasi baxımdan böyük əhəmiyyət daşıyır. Bu əməkdaşlıq tərəflər arasında qarşılıqlı etimadı möhkəmləndirir və yeni layihələrin həyata keçirilməsi üçün geniş imkanlar yaradır.

Antonio Koşta da öz çıxışında enerji sahəsində əməkdaşlığın daha da genişləndirilməsinin vacibliyini qeyd etdi. Onun sözlərinə görə, Azərbaycan Avropa üçün strateji əhəmiyyət daşıyan tərəfdaşlardan biridir və bu sahədə əməkdaşlıq gələcəkdə daha da inkişaf edə bilər.

Enerji sahəsində qurulan bu tərəfdaşlıq yalnız iqtisadi deyil, həm də siyasi baxımdan mühüm əhəmiyyət kəsb edir. Bu əməkdaşlıq Azərbaycan ilə Avropa İttifaqı arasında uzunmüddətli strateji əlaqələrin formalaşmasına zəmin yaradır.

Hidayət Səmədov

YAP Şuşa rayon təşkilatının 2 saylı ərazi partiya təşkilatının sədri