Azərbaycan–Avropa əməkdaşlığının yeni mərhələsi

Azərbaycan müstəqilliyini bərpa etdikdən sonra həyata keçirdiyi xarici siyasət kursunda Avropa institutları ilə əlaqələrin inkişafına xüsusi önəm verib. Bu münasibətlər ölkənin beynəlxalq siyasi və iqtisadi sistemə inteqrasiyasında mühüm rol oynayıb. Xüsusilə Avropa Şurasına üzvlük Azərbaycanın Avropa dəyərləri ilə yaxınlaşmasını və beynəlxalq təşkilatlarla əməkdaşlıq imkanlarını genişləndirdi. Bu addım ölkədə demokratik institutların inkişafına, hüquqi dövlət quruculuğunun güclənməsinə və beynəlxalq hüquq normalarının tətbiqinə əlavə stimul verdi.

Zaman keçdikcə Azərbaycan ilə Avropa İttifaqı arasında münasibətlər daha geniş və çoxşaxəli xarakter aldı. Bu əməkdaşlıq yalnız siyasi dialoqla məhdudlaşmadı, eyni zamanda iqtisadi, enerji, humanitar və təhlükəsizlik sahələrini də əhatə etməyə başladı. Avropa İttifaqı Azərbaycanın iqtisadi potensialını və regionda oynadığı strateji rolu nəzərə alaraq ölkəmizlə tərəfdaşlıq münasibətlərini daha da inkişaf etdirməyə maraq göstərdi.

Bu əməkdaşlığın növbəti mərhələsi 2026-cı il martın 11-də Bakıda keçirilən yüksək səviyyəli görüş zamanı bir daha özünü göstərdi. Prezident İlham Əliyev ilə Avropa İttifaqı Şurasının Prezidenti Antonio Koşta arasında aparılan müzakirələr tərəflər arasında mövcud əməkdaşlığın daha da dərinləşdirilməsi istiqamətində mühüm mesajlar verdi. Görüş zamanı tərəflər siyasi dialoqun yüksək səviyyədə olduğunu və əməkdaşlığın qarşılıqlı hörmət prinsiplərinə əsaslandığını vurğuladılar.

Səfər çərçivəsində müzakirə olunan əsas məsələlərdən biri enerji sahəsində əməkdaşlıq oldu. Azərbaycanın zəngin enerji ehtiyatları və Avropaya uzanan enerji infrastrukturu qitənin enerji təhlükəsizliyinin təmin olunmasında mühüm rol oynayır. Bu sahədə həyata keçirilən layihələr Avropa ilə Azərbaycan arasında strateji tərəfdaşlığın daha da möhkəmlənməsinə imkan yaradır.

Beləliklə, Bakı görüşü göstərdi ki, Azərbaycan ilə Avropa İttifaqı arasında münasibətlər qarşılıqlı maraqlara əsaslanan və davamlı inkişaf edən tərəfdaşlıq modelinə çevrilib. Bu əməkdaşlıq gələcəkdə daha geniş sahələri əhatə edərək tərəflər arasında siyasi və iqtisadi əlaqələrin daha da möhkəmlənməsinə şərait yaradacaq.

Xəyalə Novruzova

Şuşa rayon 7 №li tam orta məktəbin təlim-tərbiyə işləri üzrə direktor müavini, YAP Şuşa rayon təşkilatının 4 saylı ərazi partiya təşkilatının sədr müavini