Azərbaycan–Aİ münasibətlərində yeni mərhələ

Son illərdə Azərbaycanın beynəlxalq münasibətlər sistemində artan rolu ölkənin xarici siyasət strategiyasının uğurlu nəticəsi kimi qiymətləndirilir. Bakı müxtəlif beynəlxalq görüşlərin və mühüm siyasi dialoqların keçirildiyi əsas mərkəzlərdən birinə çevrilib. Azərbaycanın sabit siyasi mühiti, iqtisadi potensialı və regionda oynadığı mühüm rol ölkəni qlobal tərəfdaşlıq platformasına çevirib. Bu proses ölkənin diplomatik nüfuzunun davamlı şəkildə yüksəldiyini göstərir.

2026-cı il martın 11-də Bakıda Azərbaycan Prezidenti İlham Əliyev ilə Avropa İttifaqı Şurasının Prezidenti Antonio Koşta arasında keçirilən görüş bu baxımdan xüsusi əhəmiyyət daşıyır. Görüşdə tərəflər arasında mövcud əməkdaşlığın genişləndirilməsi və yeni istiqamətlərin müəyyənləşdirilməsi məsələləri müzakirə olunub. Bu səfər həm də Avropa İttifaqının Azərbaycanla əməkdaşlığa verdiyi önəmin göstəricisi kimi qiymətləndirilir.

Enerji əməkdaşlığı bu münasibətlərin əsas istiqamətlərindən biri hesab olunur. Azərbaycanın zəngin enerji ehtiyatları və Avropaya uzanan enerji infrastrukturu qitənin enerji təhlükəsizliyində mühüm rol oynayır. Azərbaycan qazının Avropa bazarlarına nəqli həm iqtisadi, həm də geosiyasi baxımdan böyük əhəmiyyət kəsb edir.

Bununla yanaşı, nəqliyyat və logistika sahəsində həyata keçirilən layihələr də əməkdaşlığın genişlənməsinə töhfə verir. Orta Dəhliz kimi təşəbbüslər Avropa ilə Asiya arasında ticarətin sürətlənməsinə imkan yaradır. Azərbaycanın bu marşrutda mühüm tranzit qovşağına çevrilməsi ölkənin strateji əhəmiyyətini daha da artırır.

Leyla Babışova

YAP Şuşa rayon təşkilatının sədr müavini