Bakıda keçirilən yüksək səviyyəli enerji toplantıları Azərbaycanın qlobal enerji arxitekturasında mövqeyini gücləndirdiyini bir daha təsdiqlədi. Cənub Qaz Dəhlizi Məşvərət Şurası və Yaşıl Enerji Məşvərət Şurası çərçivəsində aparılan müzakirələr enerji təhlükəsizliyi ilə bağlı yeni mərhələnin başlanğıcını göstərdi. Prezident İlham Əliyev çıxışında Azərbaycanın istehsalçı və tranzit ölkə kimi rolunun artdığını qeyd etdi. Bu gün Azərbaycan qazı 16 ölkənin enerji təminatında mühüm paya malikdir.

İxracın genişlənməsi yalnız statistik artım deyil, həm də keyfiyyət göstəricisidir. Almaniya və Avstriya kimi güclü iqtisadiyyatların Azərbaycan qazını idxal etməsi uzunmüddətli əməkdaşlığın əsasını qoyur. Suriyaya qaz tədarükünün başlanması isə ixracın Avropa hüdudlarından kənara çıxmasını nümayiş etdirir. Bu, ölkənin enerji diplomatiyasının çevik və çoxşaxəli xarakter daşıdığını sübut edir.

Gələcək mərhələdə əsas diqqət hasilatın artırılmasına yönəldilib. “Şahdəniz” üzrə yeni mərhələ, “Abşeron” yatağının genişləndirilməsi və digər perspektiv sahələr əlavə milyardlarla kubmetr qaz deməkdir. Artan hasilat mövcud infrastrukturun yenilənməsi və genişləndirilməsini tələb edir. Yeni interkonnektorların qurulması Avropada artan tələbatın qarşılanmasına imkan verəcək.

Bununla yanaşı, yaşıl enerji layihələri strateji iqtisadi transformasiyanın əsas istiqamətidir. Alternativ mənbələr hesabına daxili elektrik istehsalının artırılması ixrac üçün əlavə qaz həcmi yaradır. Bu yanaşma həm valyuta gəlirlərini artırır, həm də büdcə dayanıqlığını möhkəmləndirir. Beləliklə, enerji siyasəti iqtisadi diversifikasiyanın əsas alətinə çevrilir.

İlham Həsənov

YAP Şuşa rayon təşkilatının 26 saylı ərazi partiya təşkilatının sədri