Müasir dövrdə Azərbaycan beynəlxalq iqtisadi proseslərin fəal iştirakçısı olmaqla yanaşı, regional əməkdaşlıqda aparıcı rol oynayır. Dövlət başçısı İlham Əliyevin həyata keçirdiyi çoxşaxəli xarici siyasət nəticəsində ölkəmiz qlobal enerji dialoqunun ayrılmaz hissəsinə çevrilib. Xarici liderlərin Bakıya səfərləri və keçirilən beynəlxalq tədbirlər Azərbaycanın artan nüfuzunun bariz nümunəsidir. Bu dinamika ölkəmizin Avropa üçün strateji tərəfdaş statusunu möhkəmləndirir.

Enerji təhlükəsizliyi artıq beynəlxalq münasibətlərin əsas mövzularındandır. Bakıda keçirilən Cənub Qaz Dəhlizi Məşvərət Şurası və Yaşıl Enerji Məşvərət Şurası çərçivəsindəki nazirlər toplantıları bu reallığın təsdiqi oldu. Toplantılarda enerji bazarındakı dəyişikliklər, yeni çağırışlar və əməkdaşlıq perspektivləri geniş müzakirə edildi. Bu platformalar müxtəlif ölkələrin ortaq maraqlarını uzlaşdırmaq baxımından mühüm rol oynayır.

Cənub Qaz Dəhlizi artıq beş ildir ki, Avropanın enerji təminatında əhəmiyyətli paya malikdir. 3500 kilometrlik boru kəməri sistemi yalnız iqtisadi deyil, həm də siyasi əməkdaşlıq layihəsidir. Qaz tədarük edilən ölkələrin sayının artması Azərbaycanın enerji strategiyasının uğurunu göstərir. Bu layihə enerji marşrutlarının şaxələndirilməsində mühüm alternativ rolunu oynayır.

Azərbaycanın ixrac siyasəti çevik və perspektivlidir. Almaniya və Avstriya kimi güclü iqtisadiyyatların ölkəmizlə enerji əməkdaşlığı qurması bazar etibarlılığını artırır. Suriyaya qaz ixracının başlanması isə yeni istiqamətlərin açıldığını göstərir. Bu yanaşma ölkənin iqtisadi sabitliyinə və uzunmüddətli inkişafına xidmət edir.

Bununla yanaşı, bərpaolunan enerji sahəsində atılan addımlar Azərbaycanın gələcəyə hesablanmış siyasətindən xəbər verir. Xəzər dənizində külək enerjisi layihələri və günəş potensialının reallaşdırılması istiqamətində görülən işlər ölkəni yaşıl enerji xəritəsində ön plana çıxarır. Prezident İlham Əliyevin müəyyən etdiyi strateji kurs nəticəsində Azərbaycan enerji keçidini uğurla həyata keçirir. Bu, həm ekoloji dayanıqlıq, həm də iqtisadi inkişaf baxımından böyük əhəmiyyət daşıyır.

Arif Dostiyev

Elm və Təhsil İşçiləri Həmkarlar İttifaqı Şuşa Rayon Komitəsinin Sədri