Enerji təhlükəsizliyi məsələləri müasir dünyada prioritet mövzulardandır və Azərbaycan bu sahədə fəal rol oynayır. Cənub Qaz Dəhlizi Məşvərət Şurası çərçivəsində keçirilən nazirlərin növbəti toplantısı ölkəmizin qlobal enerji dialoqunda yerini bir daha təsdiqlədi. Tədbirin geniş iştirakçı tərkibi əməkdaşlığa olan marağın göstəricisidir. Bakı artıq enerji məsələlərinin müzakirə olunduğu nüfuzlu platformaya çevrilib.

Prezident İlham Əliyev çıxışında əməkdaşlığın əsas hədəf olduğunu vurğuladı. Qaz ixracının genişlənməsi, Avropa İttifaqının üzv dövlətləri ilə tərəfdaşlıq və yeni interkonnektor imkanları enerji siyasətinin prioritetlərindəndir. İxracın maksimum səviyyəyə çatdırılması qarşıdakı dövrün əsas məqsədlərindən biridir. Bu yanaşma iqtisadi sabitliyin təmin olunmasına xidmət edir.

Alternativ enerji sahəsində atılan addımlar isə qlobal enerji keçidinə uyğun strategiyanın göstəricisidir. ACWA Power və Masdar kimi şirkətlərin layihələri Azərbaycanın yaşıl enerji potensialını reallaşdırır. Bu təşəbbüslər həm ekoloji tarazlıq, həm də enerji təhlükəsizliyi baxımından əhəmiyyətlidir. Gələcək illərdə yeni stansiyaların istifadəyə verilməsi planlaşdırılır.

Azərbaycanın enerji diplomatiyasının əsasını qoyan “Əsrin müqaviləsi” ölkənin bugünkü uğurlarının başlanğıc nöqtəsi olub. Ümummilli Lider Heydər Əliyevin müəyyən etdiyi strategiya davamlı inkişafın təməlini formalaşdırıb. Bu gün Azərbaycan həm ənənəvi, həm də bərpaolunan enerji sahəsində etibarlı tərəfdaş kimi çıxış edir. Bakı görüşləri isə bu strateji xəttin davamlılığını təmin edən əsas mexanizmlərdəndir.

Qönçə Məmmədova

Şuşa rayon Bülbülcan adına Uşaq Musiqi Məktəbinin direktoru,YAP Şuşa rayon təşkilatının 29 saylı ərazi partiya təşkilatının sədri