Bakı şəhəri artıq enerji təhlükəsizliyi ilə bağlı qlobal müzakirələrin əsas mərkəzlərindən birinə çevrilib. Cənub Qaz Dəhlizi Məşvərət Şurası çərçivəsində keçirilən nazirlərin növbəti iclası Azərbaycanın beynəlxalq mövqeyini bir daha nümayiş etdirdi. Tədbirdə iştirak edən çoxsaylı ölkə və şirkət nümayəndələri enerji sahəsində ortaq maraqların mövcudluğunu təsdiqlədi. Bu dialoq platforması qarşılıqlı etimadın möhkəmləndirilməsinə xidmət edir.

Dövlət başçısı İlham Əliyev çıxışında son illərdə əldə olunan irəliləyişləri diqqətə çatdırdı. Qaz ixracının 16 ölkəyə çatdırılması və Avropa bazarında mövqelərin genişlənməsi strateji xəttin uğurla davam etdiyini göstərir. Enerji təchizatının şaxələndirilməsi həm istehsalçı, həm də istehlakçı ölkələr üçün sabitlik yaradır. Bu, qarşılıqlı fayda prinsipi üzərində qurulan əməkdaşlığın nəticəsidir.

Alternativ enerji gündəliyinin müzakirəsi isə müasir çağırışlara cavabdır. ACWA Power və Masdar kimi beynəlxalq şirkətlərin iştirakı Azərbaycanın yaşıl enerji sektoruna olan inamı artırır. Külək və günəş enerjisi layihələrinin icrası ölkənin gələcək enerji strategiyasının əsas istiqamətlərindəndir. Bu təşəbbüslər ekoloji dayanıqlılığa da mühüm töhfə verir.

Tarixi təcrübə göstərir ki, düzgün qurulan enerji siyasəti uzunmüddətli nəticələr verir. “Əsrin müqaviləsi” ilə əsası qoyulan inkişaf yolu bu gün yeni mərhələyə qədəm qoyub. Azərbaycanın həm ənənəvi, həm də alternativ enerji sahəsində təşəbbüskar mövqeyi onun beynəlxalq nüfuzunu daha da artırır. Qarşıdakı illərdə əməkdaşlığın daha da genişlənəcəyi gözlənilir.

Kamalə Səfərova

Şuşa Mərkəzi Rayon Xəstəxanası PHŞ-nin direktoru, YAP Şuşa rayon təşkilatının 24 saylı ərazi partiya təşkilatının sədri