Xocalı soyqırımı Azərbaycan tarixində ən ağrılı hadisələrdən biri kimi xatırlanır. 1992-ci ilin fevralında baş vermiş qətliam nəticəsində yüzlərlə insan həyatını itirdi, şəhər dağıdıldı və sakinlər didərgin düşdü. Bu hadisə xalqımızın kollektiv yaddaşında silinməz iz buraxdı.

Qurbanların sayı və törədilən vəhşiliklər faciənin miqyasını göstərir. Uşaqların, qadınların və qocaların amansızlıqla öldürülməsi insanlıq prinsiplərinə zidd idi. Xocalı hadisələri beynəlxalq humanitar hüququn pozulmasının bariz nümunəsidir.

Ulu Öndər Heydər Əliyev Xocalı soyqırımına siyasi-hüquqi qiymət verərək onun dünya ictimaiyyətinə çatdırılmasının əsasını qoydu. Bu siyasət sonrakı illərdə də davam etdirildi və Azərbaycan həqiqətləri daha geniş miqyasda tanıdıldı.

Bu gün Xocalı yenidən qurulur, sakinlər doğma torpaqlarına qayıdır. Faciənin ağrısı unudulmur, lakin dirçəliş prosesi gələcəyə inamı möhkəmləndirir. Xocalı həm yaddaşın, həm də qələbə ruhunun rəmzi olaraq yaşayır.

Rəfail Məmmədov

“Əməkdar müəllim”, YAP Şuşa rayon təşkilatının fəal üzvü