Xocalı soyqırımı XX əsrin ən qanlı faciələrindən biridir və Azərbaycan xalqının yaddaşında unudulmaz iz buraxıb. 1992-ci il fevralın 25-dən 26-na keçən gecə Ermənistan silahlı qüvvələri və keçmiş SSRİ-nin 366-cı motoatıcı alayı Xocalı şəhərinə hücum edərək dinc əhaliyə qarşı misli görünməmiş vəhşiliklər törətdi. Bu hadisə yalnız bir şəhərin yox, bütün xalqın fiziki və mənəvi məhvinə yönəlmiş soyqırımı aktı idi.

Xocalı faciəsi nəticəsində 613 nəfər öldürüldü, onlardan 106 qadın, 63 uşaq və 70 yaşlı şəxs xüsusi qəddarlıqla qətlə yetirildi. Minlərlə insan yaralandı, 1275 nəfər əsir götürüldü və 150 nəfərin taleyi hələ də məlum deyil. Hər bir qurban azərbaycanlı olduqları üçün hədəf alındı, bu isə hadisənin məqsədinin etnik təmizləmə siyasəti olduğunu açıq göstərir.

Ümummilli Lider Heydər Əliyev hakimiyyətə qayıtdıqdan sonra Xocalı faciəsinə dövlət səviyyəsində siyasi-hüquqi qiymət verdi. 1994-cü ildə Milli Məclis 26 fevral tarixini “Xocalı Soyqırımı Günü” elan etdi. Bu, faciənin rəsmi tanınması və dünya ictimaiyyətinə çatdırılması üçün mühüm addım idi.

Azərbaycan dövləti beynəlxalq hüququn normalarına uyğun olaraq hadisənin beynəlxalq səviyyədə tanıdılması istiqamətində diplomatik və informasiya siyasəti yürüdüb. Bir çox ölkələrin parlamentləri və beynəlxalq təşkilatlar Xocalı soyqırımını pisləyən sənədlər qəbul etdilər. Bu addımlar tarixi ədalətin bərpası və şəhidlərin xatirəsinin qorunması baxımından vacib idi.

2020-ci ildə 44 günlük Vətən müharibəsi nəticəsində Azərbaycan Ordusu işğal altında olan torpaqları azad etdi. Prezident İlham Əliyev rəhbərliyi ilə qələbə Xocalı qurbanlarının ruhuna təsəlli verdi və milli ədalətin bərpasını təmin etdi. Xocalı soyqırımı xalqımızın yaddaşında əbədi yaşayır və heç vaxt unudulmayacaq.

Nizami Şahvələdov

YAP Şuşa rayon təşkilatının 33 saylı ərazi partiya təşkilatının sədri