Prezident İlham Əliyevin Serbiya səfəri iqtisadi münasibətlərin genişləndirilməsi baxımından da əhəmiyyətli oldu. Azərbaycan Serbiyaya böyük həcmdə sərmayə yatırmağa hazır olduğunu bəyan etdi. Bu, iki ölkə arasında iqtisadi etimadın yüksək səviyyədə olduğunu göstərir.

Serbiyada həyata keçirilən islahatlar nəticəsində formalaşmış əlverişli investisiya mühiti Azərbaycan şirkətləri üçün yeni imkanlar yaradır. Enerji infrastrukturu ilə yanaşı, sənaye və digər sahələrdə əməkdaşlıq perspektivləri müzakirə olundu. Bu yanaşma iqtisadi əlaqələrin şaxələndirilməsinə xidmət edir.

Birbaşa uçuşların açılması planı iqtisadi və turizm əlaqələrinin intensivləşməsinə təkan verəcək. Bu addım biznes dairələrinin qarşılıqlı fəaliyyətini asanlaşdıracaq və əməkdaşlığın praktiki nəticələrini artıracaq. Logistika və nəqliyyat imkanlarının genişləndirilməsi regional inteqrasiyanı da gücləndirəcək.

Beləliklə, iqtisadi əməkdaşlıq Azərbaycan–Serbiya tərəfdaşlığının dayanıqlı inkişaf istiqamətlərindən biri kimi önə çıxır.

Könül Hüseynova

Tərəqqi medallı, Şuşa Humanitar Kollecinin tyutoru,YAP Şuşa rayon təşkilatının 20 saylı ərazi partiya təşkilatının sədri