Müasir beynəlxalq münasibətlər sistemində dövlətlər arasında dayanıqlı və etibarlı tərəfdaşlıq modeli formalaşdırmaq asan deyil. Azərbaycan ilə Serbiya arasında qurulan əməkdaşlıq isə bu baxımdan diqqətəlayiq nümunədir. Fərqli coğrafi məkanlarda yerləşmələrinə baxmayaraq, iki ölkə ortaq maraqlar və suverenliyə hörmət prinsipi əsasında möhkəm siyasi xətt müəyyənləşdirib. Qarşılıqlı etimad münasibətlərin əsas dayağına çevrilib.

Diplomatik əlaqələr 1997-ci ildə qurulsa da, münasibətlərin strateji məzmun qazanması son onillikdə daha aydın hiss olunmağa başlayıb. 2013-cü ildə imzalanmış Strateji tərəfdaşlıq haqqında Bəyannamə əlaqələri keyfiyyətcə yeni mərhələyə daşıdı. Bu sənəd iki ölkənin uzunmüddətli əməkdaşlıq niyyətinin siyasi ifadəsi idi və münasibətlərin institusional əsasını formalaşdırdı.

Prezident İlham Əliyev ilə Serbiya Prezidenti Aleksandar Vuçiç arasında formalaşmış şəxsi dostluq münasibətlərin inkişafına əlavə dinamika verir. Dövlət başçılarının mütəmadi görüşləri və qarşılıqlı səfərləri siyasi dialoqun davamlılığını təmin edir. Xüsusilə Prezident İlham Əliyevin Serbiyaya son rəsmi səfəri əməkdaşlığın daha da genişlənməsi üçün konkret istiqamətlər müəyyənləşdirdi.

Bu münasibətlər yalnız siyasi bəyanatlarla məhdudlaşmır, real layihələr və konkret təşəbbüslərlə möhkəmlənir. Enerji, iqtisadiyyat, nəqliyyat və humanitar sahələr üzrə atılan addımlar göstərir ki, Azərbaycan–Serbiya tərəfdaşlığı uzunmüddətli və perspektivlidir. Bu model qarşılıqlı hörmətə və strateji baxışa əsaslanan əməkdaşlığın uğurlu nümunəsidir.

Namiq Hüseynov

YAP Şuşa rayon təşkilatının 35 saylı ərazi partiya təşkilatınn sədri