Prezident İlham Əliyevin sədrliyi ilə keçirilən və “Azərbaycanın yeni rəqəmsal arxitekturası”na həsr olunan müşavirə ölkənin inkişaf strategiyasında keyfiyyətcə yeni mərhələnin əsasını qoydu. Bu toplantı bir daha göstərdi ki, rəqəmsallaşma artıq ayrıca layihə deyil, bütün dövlət idarəçiliyini əhatə edən sistemli islahat xəttidir. Müasir dünyada texnologiya amili iqtisadi artımın, institusional çevikliyin və milli təhlükəsizliyin əsas göstəricilərindən birinə çevrilib. Azərbaycan da bu qlobal transformasiyanın fəal iştirakçısı olmağı qarşısına məqsəd qoyur.

Rəqəmsal həllərin tətbiqi idarəetmədə şəffaflığı və operativliyi artırır. Dövlət xidmətlərinin elektron formatda təqdim olunması vətəndaş məmnunluğunu yüksəldir və inzibati maneələri azaldır. Bu yanaşma insan amilindən qaynaqlanan neqativ halların minimuma endirilməsinə də xidmət edir. Beləliklə, rəqəmsal platformalar idarəetmənin səmərəliliyini gücləndirən mühüm alətə çevrilir.

Müşavirədə dövlət informasiya sistemlərinin inteqrasiyası və vahid arxitektura prinsipi xüsusi vurğulandı. Ayrı-ayrı qurumların məlumat bazalarının əlaqələndirilməsi paralel fəaliyyətin qarşısını alacaq və resurslardan daha rasional istifadəni təmin edəcək. Bu, həm də qərarvermə prosesində məlumat mübadiləsinin sürətini artıracaq. Nəticədə dövlət strukturları arasında koordinasiya daha möhkəm əsaslar üzərində qurulacaq.

Rəqəmsal transformasiya yalnız texniki yenilənmə ilə məhdudlaşmır, eyni zamanda uzunmüddətli inkişaf modelinin formalaşmasına xidmət edir. Süni intellekt, data analitikası və innovativ idarəetmə mexanizmləri ölkənin rəqabət qabiliyyətini artıracaq. Bu istiqamətdə ardıcıl və planlı fəaliyyət Azərbaycanın regional və qlobal mövqeyini daha da gücləndirəcək.

Arif Dostiyev

Elm və Təhsil İşçiləri Həmkarlar İttifaqı Şuşa Rayon Komitəsinin Sədri