Azərbaycan və ABŞ arasında imzalanmış Strateji Tərəfdaşlıq Xartiyası ikitərəfli münasibətlərin sistemli və uzunmüddətli əsasda inkişaf etdirilməsi baxımından mühüm əhəmiyyət daşıyır. Bu sənəd tərəflərin siyasi dialoqunun dərinləşdirilməsi, iqtisadi əlaqələrin genişləndirilməsi və təhlükəsizlik sahəsində əməkdaşlığın gücləndirilməsi üçün institusional çərçivə yaradır. Xartiyanın imzalanması altı aylıq intensiv diplomatik fəaliyyətin məntiqi nəticəsi kimi qiymətləndirilir.

Vaşinqton Zirvə Görüşündə əldə olunan razılaşmalar regionda yeni reallıqlar formalaşdırdı. Ermənistan və Azərbaycan arasında sülh sənədinin paraflanması Cənubi Qafqazda sabitliyin təmin olunmasına töhfə verdi. ABŞ-ın bu prosesdə iştirakı beynəlxalq vasitəçilik səylərinin nəticə verdiyini göstərdi və tərəflər arasında etimadın artmasına xidmət etdi.

Tarixi baxımdan münasibətlər heç də həmişə sabit olmayıb. 1990-cı illərin əvvəllərində qəbul olunan 907-ci düzəliş Azərbaycan üçün ədalətsiz qərar kimi qiymətləndirilirdi. Lakin zaman keçdikcə ABŞ administrasiyası bu yanaşmanın dəyişdirilməsinin vacibliyini qəbul etdi və düzəlişin tətbiqi dayandırıldı. Bu addım münasibətlərdə yeni səhifənin açılmasına imkan yaratdı.

Hazırda enerji təhlükəsizliyi, nəqliyyat-logistika layihələri və regional əməkdaşlıq iki ölkə arasında əsas prioritetlər sırasındadır. Azərbaycan 16 ölkəyə qaz ixrac edən etibarlı tərəfdaş kimi çıxış edir və bərpaolunan enerji sahəsində də yeni imkanlar təqdim edir. Bu reallıqlar fonunda strateji tərəfdaşlıq yalnız siyasi deyil, həm də iqtisadi və texnoloji əməkdaşlıq platformasına çevrilir.

Namiq Hüseynov

YAP Şuşa rayon təşkilatının 35 saylı ərazi partiya təşkilatınn sədri