Əbu-Dabidə Prezident İlham Əliyevə təqdim olunan “Zayed İnsan Qardaşlığı Mükafatı” ölkəmizin sülh təşəbbüslərinin və multikultural siyasətinin beynəlxalq səviyyədə tanınmasının bariz nümunəsi sayılır. Şeyx Zayedin adını daşıyan bu mükafatın Azərbaycan Prezidentinə verilməsi həm dövlətlərarası etimadın, həm də humanitar dəyərlərə verilən önəmin göstəricisi kimi qiymətləndirilir.

Təqdimetmə mərasimində BƏƏ-nin inkişaf yolu xüsusi vurğulandı. Tarixə bağlılıqla müasirlik arasında balans yaradan bu dövlətin dinlər və mədəniyyətlər arasında dialoqu təşviq etməsi beynəlxalq aləmdə nümunə kimi təqdim olunur. Bu xüsusiyyətlər Azərbaycanla ortaq dəyərlərin mövcudluğunu da nümayiş etdirir.

Eyni zamanda, çıxışlarda Azərbaycan ilə Ermənistan arasında sülh prosesinin geniş regional təsirlərə malik olduğu qeyd edildi. Uzun illər davam edən münaqişədən sonra yaranmış yeni mərhələnin Cənubi Qafqaz üçün sabitlik və inkişaf imkanları yaratdığı vurğulandı, son aylarda əldə edilən irəliləyişlərin bu kursun davamlılığını göstərdiyi bildirildi.

Mükafatın verilməsi Azərbaycanın tolerantlıq modelinin qlobal miqyasda təqdir edilməsi kimi dəyərləndirilir. Məscidlərin, kilsələrin və sinaqoqların dövlət qayğısı ilə qorunması, dini icmalar arasında əməkdaşlığın təşviqi bu siyasətin praktiki nəticələri kimi təqdim olunur.

Anar Xəlilov

Şuşa Rayon Statistika İdarəsinin rəisi, YAP Şuşa rayon təşkilatının 10 saylı ərazi təşkilatının Sədr müavini