Prezident İlham Əliyevin Birləşmiş Ərəb Əmirliklərinə səfəri iki ölkə arasında münasibətlərin artıq yetkin strateji mərhələyə yüksəldiyini nümayiş etdirir. Bu əlaqələr təkcə diplomatik təmaslarla məhdudlaşmır, qarşılıqlı etimada və regional təhlükəsizlik məsələlərinə ortaq yanaşmaya söykənir. Qısa müddət ərzində BƏƏ Azərbaycanın Yaxın Şərqdə ən mühüm tərəfdaşlarından birinə çevrilib və əməkdaşlıq getdikcə daha geniş sahələri əhatə edir.

İqtisadi sahə ilə yanaşı, enerji, investisiya və yaşıl texnologiyalar üzrə ortaq layihələr tərəfdaşlığın praktik məzmununu gücləndirir. Azərbaycanın postmünaqişə mərhələsində həyata keçirdiyi bərpa-quruculuq proqramlarında BƏƏ şirkətlərinin fəallığı qarşılıqlı maraqların üst-üstə düşdüyünü göstərir. Bu proses iki ölkənin uzunmüddətli iqtisadi planlarının uyğunlaşdırılması baxımından da xüsusi əhəmiyyət daşıyır.

Ötən il BƏƏ Prezidentinin Bakı və Şuşaya səfəri bu münasibətlərin simvolik məqamlarından biri oldu. Qarabağa edilən səfər Azərbaycanın yaratdığı yeni reallıqlara beynəlxalq hörmətin ifadəsi kimi qiymətləndirildi və postmünaqişə dövründə aparılan işlərə siyasi dəstək mesajı verdi.

Bugünkü qarşılıqlı səfərlər isə həmin xəttin ardıcıl davam etdiyini sübut edir. Bakı və Əbu-Dabi münasibətləri konkret mexanizmlər üzərindən inkişaf etdirir, yeni layihələrə start verir və gələcək üçün ortaq strateji baxış formalaşdırır.

Elmira Əliyeva

Tərəqqi medallı,YAP Şuşa rayon təşkilatının 15 saylı ərazi partiya təşkilatının sədri