Prezident İlham Əliyevin Davosda “Euronews” televiziyasına verdiyi müsahibə Azərbaycanın müasir beynəlxalq münasibətlər sistemində tutduğu mövqeni aydın şəkildə ifadə etdi. Dövlət başçısı çıxışında beynəlxalq hüququn universallığının vacibliyini önə çəkərək, bu prinsiplərin selektiv deyil, bərabər şəkildə tətbiq olunmalı olduğunu vurğuladı. Azərbaycanın xarici siyasət kursunun da məhz milli maraqlara və hüquqi əsaslara söykəndiyi xüsusi qeyd olundu.

Müsahibədə ərazi bütövlüyü məsələsinə toxunan Prezident İlham Əliyev bildirdi ki, Azərbaycanın suverenliyinin tam bərpası beynəlxalq hüququn norma və prinsiplərinə uyğun şəkildə həyata keçirilib. Bu yanaşma həm ölkədaxili sabitliyin möhkəmlənməsinə, həm də regionda yeni siyasi reallıqların formalaşmasına səbəb olub. Azərbaycanın bu məsələdə tutduğu prinsipial mövqe beynəlxalq arenada da diqqətlə izlənir.

Dövlət başçısının diqqət çəkdiyi mühüm məqamlardan biri də beynəlxalq münasibətlər sisteminin yeni mərhələyə qədəm qoyması idi. Qlobal miqyasda güc amilinin artması, beynəlxalq hüququn bəzən arxa plana keçməsi reallığı fonunda Azərbaycan praqmatik və realist siyasət xətti yürüdür. Bu siyasət ölkənin təhlükəsizliyinin və strateji maraqlarının qorunmasına xidmət edir.

Prezident İlham Əliyev Azərbaycanın heç bir güc mərkəzinə bağlı olmayan balanslı siyasət yürütməsini də xüsusi vurğuladı. Müxtəlif siyasi və iqtisadi qütblərlə paralel əməkdaşlıq modeli ölkəyə manevr imkanları yaradır. Bu yanaşma qarşıdurmadan deyil, qarşılıqlı faydaya əsaslanan münasibətlərin qurulmasına yönəlib.

Nəticə etibarilə, Davosda səsləndirilən bu müsahibə Azərbaycanın qlobal qeyri-müəyyənlik şəraitində öz yolunu dəqiq müəyyən etdiyini göstərir. Milli maraqlara əsaslanan, hüquqa söykənən və balanslı siyasət modeli Azərbaycanın dəyişən dünya nizamında mövqeyini daha da möhkəmləndirir.

Kamalə Səfərova

Şuşa Mərkəzi Rayon Xəstəxanası PHŞ-nin direktoru, YAP Şuşa rayon təşkilatının 24 saylı ərazi partiya təşkilatının sədri