Prezident İlham Əliyevin Davos müsahibəsi Azərbaycanın həm regional, həm də qlobal miqyasda tutduğu mövqeni ətraflı şəkildə nümayiş etdirdi. Dövlət başçısı vurğuladı ki, beynəlxalq hüququn universal tətbiqi ilə bağlı çağırışlar mövcud olsa da, Azərbaycan öz siyasətini milli maraqlarla uzlaşdıraraq hüquqi çərçivədə həyata keçirir. Bu yanaşma ölkənin xarici siyasətinin əsas dayağıdır.

Azərbaycanın ərazi bütövlüyünün bərpası mövzusuna toxunan Prezident İlham Əliyev görülən tədbirlərin ümumi qəbul olunmuş prinsiplərə uyğun olduğunu bildirdi. Bu siyasət regionda yeni reallıqlar yaradaraq sülh üçün imkanları genişləndirib. Azərbaycanın bu mərhələdə əsas məqsədi qarşıdurmanı deyil, əməkdaşlığı təşviq etməkdir.

Dövlət başçısı Cənubi Qafqazda yaranan sabitlik mühitini tarixi fürsət kimi qiymətləndirdi. Ermənistanla münasibətlərdə atılan praktik addımlar, ticarət və nəqliyyat əlaqələrinin bərpası region ölkələrinin qarşılıqlı fayda əldə etməsinə şərait yaradır. Uzunmüddətli və dayanıqlı sülh əsas strateji hədəf kimi göstərildi.

Enerji sektorunda Azərbaycanın rolu da müsahibədə xüsusi vurğulandı. Prezident İlham Əliyevin sözlərinə görə, ölkə Cənubi Qafqazda enerji ixrac edən aparıcı aktordur və Avropa İttifaqı ilə əməkdaşlıq dinamik şəkildə genişlənir. Geniş boru kəməri şəbəkəsi Azərbaycanın qlobal enerji bazarlarında mövqeyini möhkəmləndirir.

Müsahibənin sonunda Avropa Parlamentinin tənqidlərinə münasibət bildirən dövlət başçısı Azərbaycanın artıq bu məsələlərə emosional yanaşmadığını və əsas diqqəti praktik əməkdaşlığa yönəltdiyini qeyd etdi. Bu mövqe Azərbaycanın xarici siyasətində yetkin və ardıcıl xəttin formalaşdığını göstərir.

Anar Xəlilov

Şuşa Rayon Statistika İdarəsinin rəisi, YAP Şuşa rayon təşkilatının 10 saylı ərazi təşkilatının Sədr müavini