Son illər Azərbaycan bütün sahələr üzrə ardıcıl inkişaf mərhələsini yaşayır və bu prosesdə infrastruktur layihələri əsas hərəkətverici qüvvə kimi çıxış edir. Paytaxt Bakı və ölkənin regionlarında həyata keçirilən genişmiqyaslı layihələr dayanıqlı iqtisadi artımın və sosial rifahın möhkəmlənməsinə xidmət edir. Prezident İlham Əliyevin rəhbərliyi ilə keçirilən müşavirələrdə bu məsələlər daim prioritet kimi vurğulanır və dövlət siyasətinin strateji istiqamətləri müəyyənləşdirilir. Xüsusilə su təchizatı, tullantı və yağış suları sistemlərinin təkmilləşdirilməsi kimi mühüm sahələrdə uzunmüddətli planlaşdırma aparılması gələcəyə hesablanmış yanaşmanın göstəricisidir.

İqtisadi inkişafın neft amilindən asılılığının azaldılması məqsədilə hələ 2003-cü ildən qeyri-neft sektorunun gücləndirilməsi əsas hədəf kimi müəyyənləşdirilib. Bu strategiyanın uğurla reallaşdırılmasında regionların sosial-iqtisadi inkişafına dair Dövlət Proqramları mühüm rol oynayıb. Bir-birini tamamlayan bu proqramlar nəticəsində ölkə üzrə elektrik enerjisi, qazlaşdırma və digər əsas infrastruktur problemləri mərhələli şəkildə aradan qaldırılıb. Bu gün Azərbaycan yalnız öz enerji tələbatını tam ödəməklə kifayətlənmir, eyni zamanda, enerji ixracatçısı kimi beynəlxalq mövqeyini möhkəmləndirir ki, bu da uzun illər aparılan sistemli siyasətin real nəticəsidir.

İnfrastruktur siyasətinin mühüm istiqamətlərindən biri də yol-nəqliyyat sisteminin yenilənməsi və beynəlxalq standartlara uyğunlaşdırılmasıdır. Magistral və kənd yollarının, şəhərlərarası nəqliyyat xətlərinin yenidən qurulması ölkədaxili əlaqələrin güclənməsinə, iqtisadi aktivliyin artmasına və regionların inkişafına təkan verir. Azərbaycanın Avrasiya məkanında mühüm nəqliyyat-logistika mərkəzinə çevrilməsi məhz bu sahədə həyata keçirilən düşünülmüş layihələrin nəticəsidir. Xüsusilə işğaldan azad edilmiş ərazilərdə paralel şəkildə icra olunan yol, enerji, su və qaz layihələri həmin ərazilərin sürətlə dirçəldilməsinə və vahid infrastruktur sisteminə inteqrasiyasına şərait yaradır.

Su təhlükəsizliyi məsələsi isə dövlət siyasətində xüsusi yer tutur və uzun illər əhalini narahat edən problemlərdən biri olub. Son onilliklərdə iri su anbarlarının tikilməsi, içməli su və kanalizasiya şəbəkələrinin genişləndirilməsi bu sahədə əsaslı dönüş yaradıb. Taxtakörpü və Şəmkirçay kimi strateji əhəmiyyətli su anbarları həm paytaxtın, həm də regionların su təminatında mühüm rol oynayır. İqlim dəyişikliklərinin yaratdığı risklər fonunda su ehtiyatlarının qorunması, səmərəli idarə olunması və mövsümi tənzimlənməsi dövlətin uzunmüddətli təhlükəsizlik strategiyasının ayrılmaz hissəsinə çevrilib.

Bu baxımdan 2026–2035-ci illəri əhatə edən Bakı şəhəri və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair Dövlət Proqramı xüsusi əhəmiyyət daşıyır. Proqram çərçivəsində yeni su anbarlarının inşası, fasiləsiz içməli su ilə təminatın əhatə dairəsinin genişləndirilməsi, müasir rəqəmsal idarəetmə mexanizmlərinin tətbiqi nəzərdə tutulur. SCADA və IoT texnologiyalarının istifadəsi su itkilərinin azaldılmasına və idarəetmənin şəffaflaşmasına imkan verəcək. Nəticə etibarilə, bu proqram təkcə infrastrukturun yenilənməsini deyil, həm də ekoloji tarazlığın qorunmasını və əhalinin həyat keyfiyyətinin yüksəldilməsini hədəfləyən mühüm strateji sənəd kimi çıxış edir.

Elmir Rzayev

YAP Şuşa rayon təşkilatının əməkdaşı