Müasir beynəlxalq münasibətlər sistemində enerji amili dövlətlərin geosiyasi və geoiqtisadi mövqelərinin formalaşmasında həlledici rol oynayır. Azərbaycan bu reallığı vaxtında nəzərə alaraq enerji siyasətini uzunmüddətli strateji baxış əsasında qurub. “Xızı-Abşeron” Külək Elektrik Stansiyasının istismara verilməsi bu baxışın konkret nəticəsi kimi qiymətləndirilir.

Bərpaolunan enerji mənbələrinin enerji balansında payının artırılması ölkənin enerji təhlükəsizliyinin yeni mərhələyə qədəm qoyduğunu göstərir. Külək enerjisinin genişmiqyaslı istifadəsi həm karbon emissiyalarının azalmasına, həm də təbii qaz ehtiyatlarına qənaət edilməsinə imkan yaradır. Bu isə ixrac potensialının qorunması baxımından mühüm strateji üstünlükdür.

Prezident İlham Əliyevin vurğuladığı kimi, Azərbaycanın enerji siyasəti yalnız daxili tələbatın ödənilməsinə deyil, həm də ixrac imkanlarının genişləndirilməsinə yönəlib. “Xızı-Abşeron” KES-in istehsal etdiyi enerji gələcəkdə Avropaya yönələn yaşıl enerji dəhlizlərinin mühüm komponentlərindən biri ola bilər. Xəzər dənizinin yüksək külək potensialı bu istiqamətdə əlavə imkanlar yaradır.

Bərpaolunan enerji istehsalının artması enerji saxlanması texnologiyalarının tətbiqini də aktuallaşdırır. Batareya Enerji Saxlanc Sistemlərinin yaradılması fasiləli generasiya probleminin həllinə xidmət edir və sistemin dayanıqlığını artırır. Bu texnologiyaların mərhələli şəkildə tətbiqi elmi baxımdan optimal model hesab olunur.

“Xızı-Abşeron” Külək Elektrik Stansiyası Azərbaycanın enerji strategiyasında yalnız yeni obyekt deyil, həm də yeni idarəetmə fəlsəfəsinin göstəricisidir. Bu yanaşma ölkəni qlobal enerji keçidində aktiv iştirakçıya çevirir və uzunmüddətli inkişaf üçün etibarlı zəmin yaradır.

Qönçə İsmayılova

Şuşa rayon Bülbülcan adına Uşaq Musiqi Məktəbinin direktoru,YAP Şuşa rayon təşkilatının 29 saylı ərazi partiya təşkilatının sədri