Azərbaycanın enerji sahəsində qazandığı uğurlar uzunmüddətli strateji baxışın və ardıcıl siyasətin nəticəsidir. Ölkə həm daxili tələbatı tam şəkildə ödəyir, həm də beynəlxalq bazarlarda əsas enerji təchizatçılarından biri kimi çıxış edir. Bu gün enerji sektoru yalnız iqtisadi gəlir mənbəyi deyil, həm də siyasi və diplomatik təsir alətidir.

Son illərdə qlobal enerji keçidi fonunda Azərbaycanın yaşıl enerji istiqamətində atdığı addımlar xüsusi diqqət çəkir. Qarabağ və Şərqi Zəngəzurda bərpaolunan enerji layihələrinin icrası, müasir generasiya güclərinin yaradılması və enerji infrastrukturunun yenilənməsi bu siyasətin tərkib hissəsidir. Dövlət bu sahədə həm yerli, həm də xarici investorlar üçün əlverişli mühit formalaşdırıb.

“Xızı-Abşeron” Külək Elektrik Stansiyası bu strategiyanın ən mühüm nümunələrindən biridir. Layihənin reallaşdırılması nəticəsində böyük həcmdə elektrik enerjisi istehsal olunur, təbii resurslara qənaət edilir və enerji ixrac potensialı artırılır. Eyni zamanda, bu stansiya qabaqcıl texnologiyaların ölkəyə gətirilməsinə və yerli kadr potensialının inkişafına şərait yaradır.

Azərbaycanın yaşıl enerji sahəsində əldə etdiyi nailiyyətlər beynəlxalq etimadı daha da gücləndirir. Ölkə artıq qlobal enerji təhlükəsizliyinin formalaşmasında fəal rol oynayır və təmiz enerji ilə bağlı təşəbbüslərdə lider mövqeyini möhkəmləndirir. Bu istiqamətdə atılan addımlar uzunmüddətli inkişaf strategiyasının uğurla icra olunduğunu göstərir.

Namiq Hüseynov

YAP Şuşa rayon təşkilatının 35 saylı ərazi partiya təşkilatınn sədri