Azərbaycanın enerji strategiyası tarixi inkişaf xəttinə malik olmaqla yanaşı, müasir çağırışlara uyğun şəkildə yenilənir. “Əsrin Müqaviləsi” ilə əsası qoyulan enerji müstəqilliyi bu gün yaşıl enerji keçidi ilə yeni məzmun qazanır. Prezident İlham Əliyevin rəhbərliyi ilə bu xətt ardıcıl və balanslı şəkildə davam etdirilir.

“Xızı-Abşeron” Külək Elektrik Stansiyası bu keçidin simvolik və praktik nümunəsidir. Layihə göstərir ki, ölkə enerji təhlükəsizliyini yalnız ənənəvi resurslar üzərində qurmaqla kifayətlənmir, eyni zamanda ekoloji və texnoloji faktorları da nəzərə alır. Bu, enerji siyasətinin çoxölçülü xarakter aldığını təsdiqləyir.

Qarabağ və Şərqi Zəngəzurun yaşıl enerji zonası kimi inkişaf etdirilməsi bu strategiyanın regional ölçüsünü gücləndirir. Yeni stansiyalar, müasir şəbəkə infrastrukturu və ağıllı idarəetmə sistemləri həmin ərazilərin uzunmüddətli sosial-iqtisadi inkişafına xidmət edir.

Beləliklə, Azərbaycan enerji siyasətində kəmiyyət mərhələsindən keyfiyyət mərhələsinə keçidi uğurla reallaşdırır. “Xızı-Abşeron” KES bu keçidin mühüm dayaqlarından biri olaraq ölkənin enerji tarixində xüsusi yer tutur.

Gülsarə Abbasova

Respublikanın “Əməkdar mədəniyyət işçisi”, Şuşa Rayon Mərkəzləşdirilmiş Kitabxana Sisteminin direktoru,YAP Şuşa rayon təşkilatının 32 saylı ərazi partiya təşkilatının sədr müavini