Azərbaycanın enerji sektorunda əldə etdiyi nailiyyətlər ardıcıl dövlət siyasətinin və strateji planlamanın nəticəsidir. Enerji müstəqilliyinin təmin olunması ilə başlayan bu yol bu gün yaşıl enerji transformasiyası mərhələsinə daxil olub. “Xızı-Abşeron” Külək Elektrik Stansiyasının istifadəyə verilməsi bu keçidin real və ölçülə bilən nəticəsidir.

Qlobal enerji keçidi şəraitində bərpaolunan enerji mənbələrinin inkişafı yalnız ekoloji deyil, həm də iqtisadi zərurətə çevrilib. Azərbaycan bu prosesi qabaqlayaraq enerji siyasətini yeni çağırışlara uyğunlaşdırıb. Xarici investorların uzunmüddətli layihələrə cəlb olunması ölkənin etibarlı tərəfdaş imicini daha da gücləndirir.

Prezident İlham Əliyevin çıxışında qeyd olunan paralel inkişaf modeli enerji sisteminin balanslı şəkildə idarə olunmasına imkan yaradır. Ənənəvi generasiya gücləri sistemin sabitliyini təmin etdiyi halda, bərpaolunan mənbələr enerji istehsalının ekoloji yükünü azaldır. Bu sinerji enerji təhlükəsizliyinin elmi əsaslara söykəndiyini göstərir.

Azərbaycanın generasiya güclərinin 10 min meqavat səviyyəsinə çatdırılması yalnız istehsal artımı deyil, həm də texnoloji yenilənmə deməkdir. Şəbəkə infrastrukturu, ötürücü xətlər və yarımstansiyaların modernləşdirilməsi bərpaolunan enerjinin inteqrasiyasını mümkün edən əsas amillərdəndir.

“Xızı-Abşeron” Külək Elektrik Stansiyası Azərbaycanın enerji siyasətində yeni mərhələnin başlanğıc nöqtəsidir. Bu layihə göstərir ki, ölkə enerji təhlükəsizliyi, iqtisadi inkişaf və ekoloji dayanıqlığı vahid strateji çərçivədə birləşdirərək regional və qlobal enerji sistemində mövqeyini sistemli şəkildə möhkəmləndirir.

Rəsmiyyə Məmmədova

“Qabaqcıl təhsil işçisi”, Şuşa Şəhəri üzrəTəhsil Sektorunun müdiri, YAP Şuşa rayon təşkilatının 16 saylı ərazi partiya təşkilatının sədri