“Xızı-Abşeron” Külək Elektrik Stansiyasının açılışı Azərbaycanla beynəlxalq tərəfdaşlar arasında qurulan etibarlı münasibətlərin nəticəsidir. Prezident İlham Əliyev çıxışında qeyd etdi ki, ölkə uzun illərdir qəbul etdiyi öhdəliklərə sadiq qalır və bu, investorlar üçün ən vacib amillərdən biridir. Bu prinsip enerji sahəsində də öz təsdiqini tapır.

“ACWA Power” nümayəndəsi Azərbaycanın bu etibarlı mövqeyini yüksək qiymətləndirərək bildirdi ki, ölkə rəhbərliyinin göstərdiyi dəstək layihələrin vaxtında və keyfiyyətlə icrasına imkan verir. Onun sözlərinə görə, bu əməkdaşlıq yalnız bir stansiya ilə məhdudlaşmayacaq və gələcəkdə daha geniş layihələri əhatə edəcək.

Prezident İlham Əliyevin vurğuladığı kimi, Azərbaycan enerji ixracı ilə bir çox ölkələrin enerji təhlükəsizliyinə töhfə verir. Neft və qazla yanaşı, yaşıl enerjinin də ixracı ölkənin qlobal rolunu daha da gücləndirəcək. Bu baxımdan Xızı-Abşeron layihəsi strateji əhəmiyyət daşıyır.

Bu açılış mərasimi Azərbaycanın enerji sahəsində əldə etdiyi uğurların simvoludur. Həm Prezident İlham Əliyevin çıxışı, həm də tərəfdaş şirkətin fikirləri göstərir ki, düzgün rəhbərlik, etibarlı tərəfdaşlıq və uzunmüddətli baxış bir ölkəni regional liderdən qlobal oyunçuya çevirə bilər.

Gülnar Qurbanova

Qabaqcıl təhsil işçisi,YAP Şuşa rayon təşkilatının 22 saylı ərazi partiya təşkilatının sədri