Prezident İlham Əliyevin yanvarın 5-də verdiyi müsahibə Azərbaycanın tarixində yeni bir mərhələnin başlandığını aydın şəkildə göstərdi. Dövlət başçısı vurğuladı ki, 2025-ci il Ermənistan–Azərbaycan münaqişəsinin siyasi baxımdan yekunlaşdığı il kimi yadda qalacaq. Uzun illər davam edən müharibə və qeyri-sabitlik dövründən sonra ölkə ilk dəfə real sülh şəraitində yaşamağa başlayıb.

Prezident İlham Əliyevin fikrincə, sülh anlayışı təkcə silahlı qarşıdurmanın bitməsi deyil, həm də təhlükəsizliyin və sabitliyin institusional təminatıdır. Azərbaycan cəmiyyəti bu yeni mərhələyə uyğunlaşır, çünki ölkə müstəqillik tarixinin böyük hissəsini müharibə şəraitində keçirib. Müsahibədə qeyd olundu ki, sülh şəraitində yaşamağı öyrənmək özü ayrıca bir inkişaf mərhələsidir.

Sülhün real nəticələri artıq hiss olunmaqdadır. Sosial sabitlik güclənir, iqtisadi perspektivlər genişlənir, investorların ölkəyə marağı artır. Prezident İlham Əliyev bildirdi ki, təhlükəsizliyə olan inam dövlətin uzunmüddətli inkişaf strategiyasının əsas dayaqlarından biridir və bu inam artıq mövcuddur.

Azərbaycan üçün sülh dövrü passivlik deyil, əksinə, daha fəal inkişaf mərhələsidir. Yeni reallıqlar ölkəyə regional və beynəlxalq səviyyədə daha çevik və güclü siyasət yürütmək imkanı yaradır.

Məmmədli Nəzirə

YAP Şuşa rayon təşkilatının əməkdaşı