2025-ci il Azərbaycan idman tarixində mühüm nailiyyətlərlə yadda qaldı. Beynəlxalq arenalarda əldə olunan çoxsaylı uğurlar ölkəmizin idman ölkəsi kimi mövqeyini daha da möhkəmləndirdi. Minlərlə medalın, o cümlədən yüzlərlə qızıl mükafatın qazanılması idmançılarımızın yüksək peşəkarlığının, sistemli hazırlığının və dövlət səviyyəsində yaradılan imkanların nəticəsi kimi dəyərləndirilir. Bu göstəricilər gələcək illər üçün daha iddialı hədəflərin müəyyənləşdirilməsinə zəmin yaradır.

Azərbaycanda idmanın inkişafı dövlət siyasətinin mühüm istiqamətlərindən biridir. Prezident İlham Əliyevin rəhbərliyi ilə bu sahədə ardıcıl və məqsədyönlü addımlar atılır. Gənclərin idmana marağının artırılması, onların sağlam ruhda yetişdirilməsi ölkənin uzunmüddətli inkişaf strategiyasının əsas tərkib hissəsi kimi çıxış edir. Bu yanaşma idman uğurlarının davamlı olmasını təmin edən əsas amillərdəndir.

Ölkənin bütün bölgələrini əhatə edən müasir idman infrastrukturu gənclərin idmana cəlb olunmasında mühüm rol oynayır. Regionlarda yaradılan idman obyektləri beynəlxalq yarışların paytaxtdan kənarda da keçirilməsinə imkan verir. Müxtəlif şəhərlərdə təşkil olunan irimiqyaslı idman tədbirləri Azərbaycanın geniş infrastruktur potensialını nümayiş etdirir və idmanın kütləviliyini artırır.

İdman tədbirləri eyni zamanda ölkənin beynəlxalq imicinin möhkəmlənməsinə xidmət edir. Bu yarışlar Azərbaycanı təkcə idman meydanlarında deyil, turizm və iqtisadi sahələrdə də tanıdır. Qarşıdakı illərdə idmanın davamlı inkişafı üçün mövcud potensialdan səmərəli istifadə olunacağı gözlənilir.

Anar Xəlilov

Şuşa Rayon Statistika İdarəsinin rəisi, YAP Şuşa rayon təşkilatının 10 saylı ərazi təşkilatının Sədr müavini