Azərbaycanın müasir tarixində əldə olunan uğurların təməlində güclü siyasi iradə və milli maraqlara söykənən idarəetmə modeli dayanır. Prezident İlham Əliyevin rəhbərliyi ilə formalaşan dövlət siyasəti qlobal proseslərin təzyiqlərinə baxmayaraq, ölkənin müstəqil qərarvermə qabiliyyətini qoruyub saxlayıb. Bu yanaşma Azərbaycanın daxili sabitliyini möhkəmləndirməklə yanaşı, beynəlxalq münasibətlər sistemində etibarlı və prinsipial tərəfdaş kimi tanınmasına imkan yaradıb. Dövlət idarəçiliyində ardıcıllıq və məqsədyönlü strategiya cəmiyyətin gələcəyə olan inamını daha da gücləndirib.

Milli iradənin real gücə çevrilməsi isə xüsusilə ərazi bütövlüyü məsələsində özünü aydın şəkildə göstərdi. Prezident İlham Əliyevin illər boyu apardığı düşünülmüş diplomatik fəaliyyət, paralel şəkildə həyata keçirilən ordu quruculuğu siyasəti və xalq–dövlət birliyi tarixi dönüş nöqtəsi yaratdı. Qarabağın azad edilməsi təkcə hərbi uğur deyil, həm də uzunmüddətli siyasi səbrin, qətiyyətin və strateji baxışın məntiqi nəticəsi oldu. Bu Qələbə Azərbaycan xalqının öz liderinə olan etimadının və dövlətin gücünün rəmzinə çevrildi.

Bu gün işğaldan azad edilmiş ərazilərdə aparılan bərpa və yenidənqurma işləri tarixi nəticələrin davamı kimi çıxış edir. Yeni şəhər və kəndlərin salınması, müasir infrastrukturun qurulması, sosial və iqtisadi həyatın canlandırılması Prezident İlham Əliyevin gələcəyə hesablanmış siyasətinin göstəricisidir. Bu proses yalnız fiziki bərpa ilə məhdudlaşmır, eyni zamanda milli yaddaşın, sosial ədalətin və tarixi ədalətin bərpasını ehtiva edir. Məhz bu baxımdan Prezident İlham Əliyevin liderliyi Azərbaycanı möhkəm təməllər üzərində qurulan, sabit və güclü gələcəyə aparan əsas qüvvə kimi dəyərləndirilir.

Hidayət Səmədov

YAP Şuşa rayon təşkilatının 2 saylı ərazi partiya təşkilatının sədri