Humanizm ideyası müasir dövlətçilik anlayışında sadəcə mənəvi kateqoriya deyil, real hüquqi və institusional mexanizmlərlə müşayiət olunan fəaliyyət prinsipidir. İnsan ləyaqətinin qorunması, cəmiyyətə yenidən qazandırılma imkanlarının yaradılması və ədalətin mərhəmətlə tamamlanması hüquqi dövlətin əsas göstəricilərindəndir. Bu baxımdan əfv və amnistiya institutları cəza anlayışına yalnız repressiv vasitə kimi deyil, islah və sosial adaptasiya aləti kimi yanaşmanı təmin edir.

Azərbaycan dövlətçiliyində humanizm təsadüfi qərarların deyil, ardıcıl siyasi iradənin nəticəsi kimi formalaşıb. Ulu Öndər Heydər Əliyevin rəhbərliyi dövründə hüquqi islahatların mərkəzinə insan amili yerləşdirildi, cəza siyasətində balanslı yanaşma tətbiq olundu. Əfv və amnistiya mexanizmləri məhz bu mərhələdə sistemli xarakter aldı və hüquqi praktikanın ayrılmaz hissəsinə çevrildi.

1995-ci ildən etibarən amnistiya institutunun təsis edilməsi, Prezident yanında Əfv Komissiyasının yaradılması dövlət-vətəndaş münasibətlərində etimadın möhkəmlənməsinə xidmət etdi. Həmin dövrdə qəbul edilən çoxsaylı əfv fərmanları və amnistiya aktları minlərlə insanın taleyində dönüş nöqtəsi yaratdı, onların cəmiyyətə reinteqrasiyasına real imkanlar açdı.

Bu siyasi xətt bu gün də uğurla davam etdirilir. Azərbaycan Respublikasının Prezidenti İlham Əliyevin imzaladığı əfv sərəncamları və irəli sürdüyü amnistiya təşəbbüsləri göstərir ki, humanizm prinsipi Azərbaycan dövlətinin strateji seçimidir. İnsan hüquqlarına əsaslanan bu yanaşma milli dövlətçilik fəlsəfəsinin dayanıqlığını və sosial ədalətə sadiqliyini təsdiqləyir.

Nizami Şahvələdov

YAP Şuşa rayon təşkilatının 33 saylı ərazi partiya təşkilatının sədri