Slovakiyaya rəsmi səfər çərçivəsində aparılan danışıqlar müdafiə sənayesi sahəsində əməkdaşlığın yeni məzmun alacağını göstərdi. Prezident İlham Əliyevin xüsusi olaraq vurğuladığı kimi, bu əməkdaşlıq yalnız hazır məhsul tədarükünə əsaslanmır. Əsas istiqamətlər texnologiya transferi, birgə istehsal xəttlərinin yaradılması, müştərək sənaye layihələrinin qurulması və uzunmüddətli tərəfdaşlıq mexanizmləridir. Bu yanaşma Slovakiya texnologiyalarının Azərbaycan sənayesində tətbiqinə və ölkənin müdafiə sənayesinin modernləşdirilməsinə şərait yaradır.

Sənaye kooperasiyası müdafiə sahəsi ilə məhdudlaşmadan daha geniş iqtisadi sektorlara yayılır. Avtomobil sənayesi, kənd təsərrüfatı texnikası, nəqliyyat vasitələri və müasir texnoloji avadanlıqlar üzrə əməkdaşlıq imkanları iki ölkə arasında sənaye əlaqələrinin dərinləşdiyini göstərir. Müzakirələr zamanı yeni istehsal layihələrinin yaradılması, investisiya təşviqi vasitələrinin tətbiqi və sənaye zonalarına birgə iştirak imkanları əsas mövzular kimi önə çıxıb. Bu, Slovakiya şirkətlərinin Azərbaycan bazarına inteqrasiya olunması və qarşılıqlı faydalı sənaye tərəfdaşlığının genişlənməsi üçün real zəmindir.

İkitərəfli iqtisadi əlaqələrin səmərəliliyini artırmaq üçün ticarət dövriyyəsinin genişləndirilməsi də vacib məsələlərdən biri kimi müzakirə olunub. Mövcud ticarət statistikası əməkdaşlığın potensialı ilə müqayisədə kifayət qədər aşağıdır. Bu səbəbdən gömrük prosedurlarının sadələşdirilməsi, logistik əməliyyatların optimallaşdırılması və qarşılıqlı sərgi-ticarət platformalarının yaradılması kimi təşəbbüslər irəli sürülüb. Bu addımlar sənaye və ticarət əlaqələrinin pragmatik şəkildə gücləndirilməsinə imkan verəcək.

Elmira Əliyeva

Tərəqqi medallı,YAP Şuşa rayon təşkilatının 15 saylı ərazi partiya təşkilatının sədri