Azərbaycan-Slovakiya münasibətləri bu gün regionda sabitlik və inkişafın təmin olunmasına yönəlmiş strateji əməkdaşlıq modeli kimi diqqət çəkir. Prezident İlham Əliyevin 8 dekabrda Slovakiyaya rəsmi səfəri bu əməkdaşlığın yeni səhifəsini açdı. Görüşlər zamanı iki ölkə arasında uzun illər ərzində formalaşmış dostluq münasibətlərinin daha da genişləndirilməsi üçün mühüm qərarlar qəbul edildi. Səfərin siyasi əhəmiyyəti ilə yanaşı, iqtisadi və texnoloji sahələrdə də yeni imkanlar yaratdığı xüsusi qeyd edilməlidir.

İkitərəfli münasibətlərin tarixi 1990-cı illərin əvvəllərinə dayanır. Slovakiya 1992-ci ildə Azərbaycanın müstəqilliyini tanımış və 1993-cü ildə diplomatik münasibətlər qurulmuşdur. 2019-cu ildən Slovakiyanın Bakıda səfirliyinin, 2023-cü ilin iyulundan isə Azərbaycanın Bratislavada səfirliyinin fəaliyyət göstərməsi əlaqələrin institusional əsaslarının genişləndirildiyini göstərir. Fəxri konsulluğun 2009-cu ildən fəaliyyət göstərməsi isə bu münasibətlərin sosial və iqtisadi miqyasının artmasına töhfə verir.

Slovakiya Prezidenti Peter Pelleqrininin Azərbaycan Prezidentinin səfərinə verdiyi yüksək dəyər ikitərəfli münasibətlərin strateji xarakterini təsdiq edir. O, əlaqələrin hələ də böyük inkişaf potensialına malik olduğunu bildirərək iki ölkənin davamlı əməkdaşlığı üçün geniş imkanların mövcud olduğunu vurğuladı. Prezident İlham Əliyev isə əlaqələrin strateji tərəfdaşlıq səviyyəsinə yüksəldiyini, iqtisadi və siyasi sahələrdə qarşılıqlı layihələrin genişləndirilməsinin vacibliyini qeyd etdi.

Enerji sektorunda əməkdaşlıq Slovakiya üçün böyük əhəmiyyət kəsb edir. Azərbaycanın 25 milyard kubmetrlik qaz ixracı, bunun yarısının Avropaya yönəlməsi Slovakiyanın enerji təchizatı baxımından yeni perspektivlər yaradır. Bununla yanaşı, Slovakiya şirkətlərinin Ağdamın Baş Qərvənd kəndində həyata keçirdikləri layihələr postmüharibə dövründə regionun bərpasına real töhfədir. Yeni texnologiyalar və data mərkəzləri üzrə əməkdaşlıq isə gələcək iqtisadi tərəfdaşlığın əsas istiqamətlərindən biri olacaq.

Anar Cəbizadə

Şuşa Dövlət Rəsm Qalereyasının direktoru, YAP Şuşa rayon təşkilatının 37 saylı ərazi partiya təşkilatının sədri