Prezident İlham Əliyevin Bratislavaya səfəri çərçivəsində enerji məsələləri xüsusi əhəmiyyət daşıdı. Azərbaycan son illər qaz hasilatını artıraraq Avropanın əsas enerji tərəfdaşlarından birinə çevrilib. Yeni yataqların istismarı, həmçinin bərpaolunan enerji layihələrinin genişləndirilməsi ölkənin enerji ixrac imkanlarını daha da artırır. Prezidentin bəyanatında Slovakiyaya təbii qaz tədarükünün mümkünlüyü haqqında açıqlamalar Azərbaycanın Avropa enerji təhlükəsizliyindəki rolunun artdığını göstərir. Bu, xüsusilə enerji şaxələndirilməsi siyasəti həyata keçirən Slovakiya üçün strateji dəyərə malikdir.

Azərbaycan bərpaolunan enerji layihələrini genişləndirdikcə, ölkədə daxili tələbatın qarşılanmasında daha çox yaşıl enerji payı istifadə olunacaq, hasil olunan əlavə qaz isə Avropaya, o cümlədən Slovakiyaya yönləndiriləcək. Hazırda inşa olunan külək və günəş elektrik stansiyaları qaz istehlakı yükünü azaldır və ixrac üçün əlavə həcmlər yaradır. Prezident İlham Əliyevin açıqladığı kimi, ölkənin qaz ixracı həm mövcud marşrutlar, həm də yeni infrastruktur imkanları hesabına genişlənəcək. Bu, Avropa İttifaqının enerji bazarına sabitlik gətirəcək və Slovakiya kimi ölkələrin təchizat təhlükəsizliyini gücləndirəcək.

Enerji sahəsində əməkdaşlıq iki ölkə arasında ümumi strateji tərəfdaşlığın əsas komponentlərindən biri kimi çıxış edir. Bununla yanaşı, siyasi dialoq, təhlükəsizlik və hərbi-texniki əməkdaşlıq, iqtisadi layihələr və parlament diplomatiyası ikitərəfli münasibətlərin daha geniş çərçivədə inkişafını təmin edir. Slovakiya Azərbaycanın Cənubi Qafqaz regionunda etibarlı tərəfdaşı kimi çıxış edir və bu əməkdaşlıq həm regional sabitliyə, həm də Avropa İttifaqı daxilində qarşılıqlı maraqlara uyğun gəlir. Bu əlaqələrin inkişafı yeni investisiya imkanları yaradır və Azərbaycanın Avropadakı mövqelərini gücləndirir.

Zərifə İbrahimova

“Qabaqcıl təhsil işçisi”,YAP Şuşa rayon təşkilatının 25 saylı ərazi partiya təşkilatının sədr müavini