Azərbaycan və Slovakiya arasında enerji sahəsində əməkdaşlıq strateji xarakter daşıyır. 2024-cü ildən Slovakiyaya qaz tədarükü başlanması, Avropanın enerji bazarında Azərbaycanın rolunu artırıb. Ölkəmiz təbii qaz ehtiyatlarını artırmaqla yanaşı, yeni yataqların istismara verilməsi və yaşıl enerji layihələrinə sərmayələr qoymaqla həm daxili tələbatı təmin edir, həm də Avropaya əlavə ixrac imkanları yaradır. Prezident İlham Əliyevin bəyanatında da qeyd olunduğu kimi, Azərbaycan Slovakiyanı istənilən həcmdə enerji ilə təmin etmək gücündədir. Bu, qarşılıqlı etimadın və strateji tərəfdaşlığın mühüm göstəricisidir.

Hazırda Azərbaycanın ümumi qaz ixracı 25 milyard kubmetrdir və bunun yarısı Avropa ölkələrinə yönəlir. Enerji ixracının genişlənməsi Slovakiya üçün davamlı və etibarlı təchizat təmin edir, ölkənin enerji siyasətinə dəstək olur. Eyni zamanda, Azərbaycanın genişlənən yaşıl enerji potensialı, xüsusilə günəş və külək elektrik stansiyaları, qaz ixracının həcmini daha da artırmağa imkan verir. Bu, Avropanın enerji təhlükəsizliyini gücləndirən və qarşılıqlı faydalı əməkdaşlığa çevrilən layihələr üçün geniş perspektiv açır.

Enerji əməkdaşlığı təkcə ixrac və təchizatla məhdudlaşmır. Bu sahə həmçinin iqtisadi və texnoloji əməkdaşlığı da gücləndirir. Azərbaycan və Slovakiya birgə layihələr vasitəsilə enerji infrastrukturunu modernləşdirir, texnologiya transferi və investisiya imkanlarını genişləndirir. Bu əməkdaşlıq həm ölkələrarası, həm də Avropa məkanında strateji əməkdaşlığın davamlı inkişafını təmin edir.

Salman Ağalarov

Şuşa rayon Xəlfəli kənd Uşaq Musiqi Məktəbinin direktoru, YAP Şuşa rayon təşkilatının 28 sayılı ərazi partiya təşkilatının sədri