Dekabrın 8-də Prezident İlham Əliyevin Slovakiyaya səfəri Azərbaycan–Slovakiya münasibətlərinin inkişaf trayektoriyasında mühüm mərhələ kimi dəyərləndirilir. Diplomatik əlaqələrin 1993-cü ildə qurulmasına baxmayaraq, iki ölkə arasında münasibətlərin əsasları sovet dövründən mövcud olub və müstəqillik illərində bu əlaqələr ardıcıl şəkildə genişlənib. Slovakiya Azərbaycanın Avropa İttifaqına daxil olan və rəsmi şəkildə strateji tərəfdaşlıq bəyannaməsi imzalanmış 9 ölkədən biri olmaqla, Bakı üçün mühüm siyasi və iqtisadi tərəfdaş statusuna malikdir. Prezident İlham Əliyevin səfər çərçivəsində açıqladığı kimi, imzalanmış Strateji Tərəfdaşlıq haqqında Bəyannamə əlaqələri ən yüksək səviyyəyə yüksəldib və bu çərçivə bütün sahələr üzrə əməkdaşlığın genişlənməsinə şərait yaradıb.

Enerji sektoru bu səfərin mərkəzi mövzularından biri oldu. Prezident İlham Əliyev bəyanatında Azərbaycanın qaz hasilatını artırdığını, yeni yataqların istismara verildiyini və ölkənin artıq 14 dövlətə qaz ixrac etdiyini vurğuladı. Azərbaycanın genişmiqyaslı yaşıl enerji gündəliyi, xüsusilə külək və günəş enerjisi layihələri, ənənəvi enerji resurslarına qənaət etməyə imkan verir və bu qazın əsas ixrac istiqamətinin Avropa olacağı təsdiqlənir. Dövlət başçısı Slovakiyaya və region ölkələrinə daha böyük həcmdə qaz ixracının mümkünlüyünü qeyd edərək, enerji əməkdaşlığının növbəti illərdə daha strukturlaşdırılmış və geniş formatda həyata keçiriləcəyinə işarə etdi. Bu, həm Azərbaycanın enerji təhlükəsizliyindəki rolunu artırır, həm də Slovakiyanın alternativ enerji mənbələri ilə təminatını gücləndirir.

Səfər çərçivəsində müzakirə olunan mövzular təkcə enerji sahəsi ilə məhdudlaşmayıb, siyasi, iqtisadi, təhlükəsizlik və hərbi-texniki əməkdaşlıq məsələlərini də əhatə edib. Slovakiya Azərbaycanın Cənubi Qafqaz regionunda mühüm tərəfdaş kimi çıxış edir və Avropa İttifaqı çərçivəsində münasibətlərin inkişafında fəal mövqe nümayiş etdirir. Parlament diplomatiyası, iqtisadi layihələr, biznes əməkdaşlığı və qarşılıqlı səfərlər ikitərəfli dialoqu daha da möhkəmləndirir. Bu dinamika göstərir ki, Azərbaycan–Slovakiya əlaqələri davamlı olaraq yüksəlir və yeni əməkdaşlıq platformaları formalaşdırılır. Bütün bunlar Azərbaycan dövlətinin beynəlxalq nüfuzunun möhkəmlənməsinə də əlavə töhfə verir.

Aynurə Məlikova

Şuşa rayon 10 №li tam orta məktəbin direktoru,YAP Şuşa rayon təşkilatının 25 saylı ərazi partiya təşkilatının sədri