Azərbaycan–Slovakiya münasibətləri son illərdə siyasi dialoq, iqtisadi əməkdaşlıq və regional təhlükəsizlik məsələləri üzrə daha strukturlaşdırılmış məzmun qazanıb. 2023-cü il Strateji Tərəfdaşlıq Bəyannaməsi bu əlaqələrin institusional əsasını müəyyənləşdirərək iki ölkə arasında uzunmüddətli qarşılıqlı etimada söykənən əməkdaşlıq modelini formalaşdırdı. 2025-ci il dekabrın 8-də Prezident İlham Əliyevin Bratislavaya rəsmi səfəri həmin çərçivənin real addımlarla möhkəmləndirildiyini sübut etdi və münasibətlərin gələcək istiqamətlərinə dair aydın baxış yaratdı.

Enerji məsələləri səfər çərçivəsində xüsusi yer tutdu. Azərbaycan Prezidenti Avropanın enerji təhlükəsizliyinə töhfələrin davamlı olacağını vurğulayaraq, həm mövcud enerjidaşıyıcılarının tədarükü, həm də yaşıl enerji üzrə əməkdaşlıq imkanlarının genişliyini önə çəkdi. Azərbaycanın əlavə qaz ixracı potensialı, Cənub Qaz Dəhlizinin rolunun artması və 8 giqavata qədər yüksəlməsi gözlənilən yaşıl enerji gücləri Slovakiya ilə əməkdaşlıq üçün yeni praktiki imkanlar yaradır. Bununla yanaşı, tərəflər nəqliyyat-logistika sahəsində də birgə fəaliyyətin perspektivlərini müəyyənləşdirərək Avropa-Orta Asiya marşrutlarında Slovakiyanın rolunun artırılması barədə razılaşmalar əldə etdilər.

Səfər təkcə enerji və nəqliyyat sahələri ilə məhdudlaşmadı. Müdafiə sənayesi, avtomobil istehsalı, texnologiya və kənd təsərrüfatı texnikası üzrə əməkdaşlıq mövzuları üzrə aparılan danışıqlar real sənaye tərəfdaşlığının formalaşdığını göstərdi. Slovakiya ilə humanitar əlaqələrin genişləndirilməsi, o cümlədən təhsil və mədəniyyət proqramları barədə razılaşmalar iki ölkənin münasibətlərinin sosial əsasını gücləndirmək baxımından mühüm dəyər daşıyır. Ümumilikdə, səfər Azərbaycan–Slovakiya əlaqələrinin çoxşaxəli inkişaf tendensiyasını təsdiqlədi və əməkdaşlığın yeni mərhələsinin siyasi konturlarını müəyyən etdi.

Nazilə İbrahimova

Qabaqcıl təhsil işçisi, YAP Şuşa rayon təşkilatının fəal üzvü