Azərbaycan və Slovakiya arasında siyasi münasibətlər son illər xüsusilə fəallaşıb və Prezident İlham Əliyevin Bratislavaya səfəri bu əməkdaşlığın strukturlaşdırılması baxımından mühüm əhəmiyyət kəsb edib. Danışıqların əsas mövzuları arasında strateji tərəfdaşlıq sənədinin icrası, institusional qarşılıqlı fəaliyyətin genişləndirilməsi və regional təhlükəsizlik məsələləri yer alıb. Slovakiya Prezidenti Peter Pelleqrininin iki ölkə münasibətlərini strateji tərəfdaşlıq səviyyəsində qiymətləndirməsi tərəflər arasında yüksək siyasi etimadın mövcudluğunu göstərir.

Regional sabitlik məsələləri də görüşlərin mühüm hissəsini təşkil edib. Slovakiya rəhbərliyi Azərbaycan və Ermənistan arasında aparılan danışıqlarda əldə olunan razılaşmaları müsbət qiymətləndirərək sülh prosesinin davam etdirilməsini dəstəklədiyini bildirib. Bu mövqe Cənubi Qafqazda formalaşan yeni təhlükəsizlik arxitekturasına Avropa ölkələrinin yanaşmasının praqmatik xarakter daşıdığını nümayiş etdirir. Slovakiyanın 8 Noyabr Qələbə Günü paradında yüksək səviyyədə təmsil olunması siyasi dialoqun intensivliyini daha da artıran addımlardan olub.

Siyasi əməkdaşlığın genişləndirilməsi həmçinin iqtisadi və təhlükəsizlik sahələrində qarşılıqlı fəaliyyət üçün əlverişli şərait yaradır. Müdafiə sənayesi və sənaye kooperasiyası üzrə müzakirələrin davam etdirilməsi bu sahədə orta və uzunmüddətli layihələr üçün hüquqi və texnoloji bazanın formalaşmasına xidmət edir. Bununla yanaşı, nəqliyyat və enerji əməkdaşlığının siyasi dəstəklə müşayiət olunması iki ölkə münasibətlərinin çoxşaxəli xarakter aldığını göstərir.

Rəfail Məmmədov

“Əməkdar müəllim”, YAP Şuşa rayon təşkilatının fəal üzvü