Azərbaycan ilə Slovakiya arasında əlaqələr zaman keçdikcə daha da dərinləşərək strateji tərəfdaşlıq səviyyəsinə çatmışdır. Prezident İlham Əliyevin Slovakiyaya 8 dekabr tarixində etdiyi rəsmi səfər bu inkişafın məntiqi davamı kimi qiymətləndirilir. Səfər çərçivəsində aparılan müzakirələr və imzalanmış sənədlər göstərdi ki, iki ölkə həm regional sabitlik, həm də iqtisadi istehsal və enerji sahələrində uzunmüddətli və qarşılıqlı maraqlara əsaslanan əməkdaşlığa sadiqdirlər. Bu görüş həm Slovakiya, həm də Azərbaycan üçün mühüm diplomatik hadisə oldu.

Slovakiya ilə diplomatik münasibətlər 1990-cı illərin əvvəllərində qurulmuş və ardıcıl şəkildə inkişaf etmişdir. 1992-ci ildə Slovakiyanın Azərbaycanın müstəqilliyini tanıması bu əlaqələrin təməl daşıdır. 2019-cu ilin oktyabrında Slovakiyanın Bakıda səfirliyinin fəaliyyətə başlaması və 2023-cü ilin iyulunda Azərbaycanın Bratislavada səfirlik açması münasibətlərin yeni mərhələyə qədəm qoyduğunu göstərir. Bunlarla yanaşı, 2009-cu ildən fəaliyyət göstərən fəxri konsulluq iki ölkə arasında humanitar və iqtisadi bağlantıların genişlənməsinə töhfə verir.

Görüşlər zamanı səsləndirilən fikirlər bir daha təsdiq etdi ki, Slovakiya Azərbaycanı regionda strateji tərəfdaş kimi qəbul edir. Prezident Peter Pelleqrini səfərin güclü siyasi rəmz daşıdığını vurğuladı və münasibətlərin yalnız dostluq çərçivəsi ilə məhdudlaşmadığını, böyük potensiala malik olduğunu bildirdi. Prezident İlham Əliyev isə əlaqələrin strateji tərəfdaşlıq səviyyəsinə yüksəldiyini xüsusi qeyd edərək, qarşıdakı illər üçün əməkdaşlıq xəttinin daha da genişlənəcəyini vurğuladı.

Enerji, müdafiə sənayesi, nəqliyyat və rəqəmsal texnologiyalar üzrə əməkdaşlıq əlaqələrin gələcəyində mühüm yer tutur. Azərbaycanın böyük enerji potensialı, xüsusilə 2 giqavatlıq istifadə olunmayan gücün növbəti beş ildə 8 giqavata çatdırılacağı barədə verilən məlumat Slovakiya üçün yeni investisiya imkanları yaradır. Eyni zamanda, data mərkəzlərinin və süni intellekt infrastrukturlarının yaradılması istiqamətində aparılan müzakirələr gələcək əməkdaşlığın əsas prioritetlərindən birinə çevrilir.

Anar Əlizadə

Niyazi adına Şuşa şəhər Uşaq İncəsənət Məktəbinin direktoru, YAP Şuşa rayon təşkilatının 14 saylı ərazi partiya təşkilatının sədri