Kəlbəcər rayonu Azərbaycan üçün həm strateji, həm də təbii sərvətləri baxımından böyük əhəmiyyət kəsb edir. Dağlıq relyefi və çətin keçilən yollarına baxmayaraq, rayon ölkənin müdafiə və nəqliyyat infrastrukturu üçün xüsusi önəm daşıyır. Kəlbəcərin geniş yaylaqları, meşə və otlaq sahələri həm kənd təsərrüfatı, həm də heyvandarlıq üçün əlverişli şərait yaradır. Bu ərazilər həm də turizm potensialına malikdir, çünki burada əsrarəngiz təbiət, təmiz hava və mineral bulaqlar yerləşir.

Kəlbəcər eyni zamanda zəngin tarixi irsi ilə fərqlənir. Qədim yaşayış məskənləri, 30 min ildən çox tarixi olan abidələr, 6 min il yaşı olan qaya təsvirləri və daş abidələr bu bölgənin qədim sivilizasiyaların mərkəzi olduğunu sübut edir. Buradakı abidələr həm erkən türklüyün, həm atəşpərəstliyin, həm də xristianlıq və İslam dövrlərinin mədəniyyət izlərini daşıyır. Bu baxımdan Kəlbəcər yalnız təbii sərvətləri ilə deyil, həm də mədəni və tarixi irsi ilə ölkəmiz üçün əvəzsizdir.

Ermənistanın 1993-cü ildə Kəlbəcəri işğal etməsi nəticəsində rayonun tarixi, mədəni və sosial infrastrukturu tamamilə məhv edildi. Rəsmi İrəvanın vandalizm siyasəti, qanunsuz məskunlaşdırma və tarixi irsin dağıdılması beynəlxalq hüquq normalarına zidd idi. Lakin 2020-ci ilin Vətən müharibəsi zamanı Azərbaycan Ordusunun qəhrəman əməliyyatları nəticəsində Kəlbəcər 27 il sonra azad edildi. 10 noyabr 2020-ci ildə imzalanmış kapitulyasiya aktı ilə rayon qan tökülmədən Azərbaycan tərəfinə təhvil verildi.

Azadlıqdan sonra Prezident İlham Əliyevin rəhbərliyi altında Kəlbəcərdə sürətli bərpa və quruculuq işləri başlandı. Yeni yaşayış məntəqələrinin salınması, yolların və tunellərin tikilməsi, su və elektrik stansiyalarının fəaliyyəti regionu iqtisadi və sosial baxımdan gücləndirdi. “İstisu” mineral su zavodunun bərpası ilə turizm potensialı artırıldı, kənd təsərrüfatı və heyvandarlıq üçün geniş imkanlar yarandı. Bu inkişaflar göstərir ki, Kəlbəcər artıq yalnız azad edilmiş torpaq deyil, həm də Azərbaycanın gələcək inkişafının mühüm mərkəzlərindən biridir.

Səbinə Gözəlova

YAP Şuşa Rayon Təşkilatının 41 saylı ərazi partiya təşkilatının sədri