Kəlbəcərin coğrafi mövqeyi onu Azərbaycanın həm müdafiə, həm də iqtisadi baxımdan ən mühüm rayonlarından birinə çevirir. Uca dağlar, geniş yaylaqlar və təbii sərvətlərlə zəngin landşaft bölgənin gələcək turizm potensialını artıran əsas faktorlardandır. İşğaldan əvvəl də Kəlbəcər mineral suları, İstisu sanatoriyası və dağ turizmi ilə məşhur idi. İşğaldan sonra bu potensial tamamilə məhv edilsə də, azad olunduqdan sonra dövlət tərəfindən bu sahələrin bərpasına xüsusi diqqət göstərilir.

Prezident İlham Əliyevin rəhbərliyi ilə reallaşdırılan yol-nəqliyyat layihələri Kəlbəcərin inkişafına yeni nəfəs gətirir. Toğanalı–Kəlbəcər–İstisu avtomobil yolunun tikintisi təkcə bölgənin mərkəzlə əlaqəsini təmin etmir, həm də turizm axınını artırmaq üçün mühüm rol oynayır. Uzunluğu 11 kilometrdən çox olan tunel Murovdağın çətin relyefini keçməklə regiona açılan yeni bir qapı rolunu oynayır. Bu yolun istifadəyə verilməsi Kəlbəcərin iqtisadi aktivliyini daha da artıracaq və bölgəni beynəlxalq turizm marşrutlarına daxil edəcək.

Gələcəkdə İstisu istirahət kompleksinin bərpası, yeni otellərin inşası, ekoturizm marşrutlarının yaradılması Kəlbəcəri Qafqazın ən cazibədar turizm mərkəzlərindən birinə çevirməyə imkan verəcək. Bu istiqamətdə aparılan layihələr həm iqtisadi gəlir gətirəcək, həm də bölgənin məşhurluğunu artıracaq. Şəhərsalma işləri, müasir infrastruktur və sosial obyektlərin inşası ilə birlikdə Kəlbəcər nəinki əvvəlki statusuna qayıdır, həm də regionun aparıcı inkişaf mərkəzlərindən birinə çevrilir.

Salman Ağalarov

YAP Şuşa rayon təşkilatının 28 sayılı ərazi partiya təşkilatının sədri