Kəlbəcərin işğaldan azad edilməsi ilə ölkəmiz yeni inkişaf mərhələsinə qədəm qoydu. Doğma torpaqlarından didərgin salınmış minlərlə sakin üçün 25 noyabr tarixinin bərpa olunmuş şəhər günü kimi qeyd edilməsi həm rəmzi, həm də siyasi baxımdan mühüm əhəmiyyətə malikdir. Çünki bu gün təkcə bir rayonun azad olunmasının deyil, bütövlükdə dövlətimizin gücünün və xalqımızın əzminin təntənəsi kimi qəbul edilir. Kəlbəcərin zəngin təbii sərvətləri, geniş yaylaqları, mineral su ehtiyatları və tarixi irsi regionun inkişaf perspektivlərini daha da artırır.

Son beş ildə Prezident İlham Əliyevin bu bölgəyə ardıcıl səfərləri Kəlbəcərin bərpasına verilən yüksək prioritetin göstəricisidir. Bu səfərlər zamanı yeni yol-nəqliyyat layihələrinin təməli qoyulmuş, yaşayış kompleksləri istifadəyə verilmiş, müxtəlif infrastruktur və enerji layihələrinin açılışı həyata keçirilmişdir. Xüsusilə Toğanalı–Kəlbəcər–İstisu magistral yolu Murovdağın çətin relyefini keçməklə regionun nəqliyyat xəritəsini tamamilə dəyişir. Tunel və körpülərin çoxluğu bu yolun strateji əhəmiyyətini bir daha artırır və gələcək turizm axınının təminatına zəmin yaradır.

Kəlbəcərdə inşa olunan su elektrik stansiyaları bölgənin enerji təhlükəsizliyində mühüm rol oynayır. Təmiz enerji mənbələrinin tətbiqi yalnız iqtisadi sabitliyi deyil, həm də ekoloji tarazlığı qorumaq məqsədi daşıyır. Yeni məhəllələrin inşası, məktəb, xəstəxana və sosial obyektlərin tikintisi isə sakinlərin rahat yaşayışını təmin edən əsas amillərdəndir. Bu layihələr Böyük Qayıdış Proqramının real nəticələr verdiyini göstərir. Kəlbəcərin yenidən qurulması bir bölgənin deyil, bütöv Azərbaycanın gələcəyinə yönəlmiş strateji addımdır.

Elçin Dadaşov

YAP Şuşa rayon təşkilatının 4 saylı ərazi partiya təşkilatının sədri