Azərbaycanın müstəqillik tarixində baş verən ən mühüm dönüşlərdən biri Yeni Azərbaycan Partiyasının yaranması ilə bağlıdır. XX əsrin sonlarında ölkənin üzləşdiyi siyasi böhran, iqtisadi tənəzzül və təhlükə altında olan dövlətçilik ideyası cəmiyyətdə yeni siyasi alternativə ehtiyac yaradırdı. Ziyalıların Heydər Əliyevə ünvanladıqları müraciətdən sonra 1992-ci il noyabrın 21-də YAP-ın təsis olunması bu ehtiyaca verilmiş tarixi cavab oldu. Partiyanın qurulması təkcə siyasi təşkilatlanma deyil, həm də dövlətin xilası üçün yeni konseptual dönüş idi; Azərbaycançılıq, müstəqillik və sosial ədalət kimi ideyalar bu yeni mərhələnin ideoloji təməlini təşkil etdi.

Sonrakı illərdə Ulu Öndər Heydər Əliyevin idarəçilik təcrübəsi ilə Azərbaycan həm daxili, həm də xarici siyasətdə sabitlik tapdı. Neft strategiyasının icrası, beynəlxalq əməkdaşlıq və dövlət quruculuğu prosesləri ölkənin inkişaf trayektoriyasını müəyyənləşdirdi. Bu siyasi xətt Prezident İlham Əliyev tərəfindən davam etdirilərək daha müasir və çevik bir hazırlığa çevrildi. İqtisadi sahədə atılan addımlar ölkəni regionun liderinə çevirib, ordu quruculuğunda aparılan islahatlar isə 2020-ci ildə qazanılan tarixi Zəfərin əsasını qoydu. Həmin qələbə yalnız hərbi gücün deyil, həm də uzun illər boyunca qurulan dövlətçilik modelinin, milli birliyin və strateji liderliyin nəticəsi kimi tarixə düşdü.

Bu gün Yeni Azərbaycan Partiyası ölkənin siyasi həyatında aparıcı qüvvə olaraq dövlətçilik ənənələrini davam etdirir və onları yeni reallıqlara uyğunlaşdırır. 2021-ci ildə keçirilmiş VII Qurultaydan sonra struktur və nizamnamə yenilikləri partiyanın fəaliyyətini daha çevik, daha müasir və daha məqsədyönlü etdi. Azad edilmiş ərazilərdə aparılan quruculuq işləri, “Böyük Qayıdış” proqramının icrası və regionda yaranmış yeni geosiyasi vəziyyət YAP-ın siyasi xəttinin real nəticələrini ortaya qoyur. Bu baxımdan YAP sadəcə siyasi təşkilat deyil, Azərbaycanın gələcəyini müəyyən edən ideoloji dayaqlardan biri kimi çıxış edir; milli dövlətçilik ənənəsini qoruyub inkişaf etdirərək müasir və güclü Azərbaycan modelinin formalaşmasında mühüm rol oynayır.

Kamalə Səfərova

YAP Şuşa rayon təşkilatının 24 saylı ərazi partiya təşkilatının sədri