Ağdam, Azərbaycanın azad edilmiş ərazilərinin ən parlaq simvoludur. 20 noyabr 2020-ci ildə bir güllə belə atılmadan azad edilmiş şəhər, 27 illik işğaldan sonra xalqımızın qürur və dirçəliş məkanı olmuşdur. Prezident İlham Əliyevin 2023-cü il Sərəncamı ilə təsis edilmiş Ağdam Şəhəri Günü, hər il bu zəfərin və qayıdışın təntənəli qeyd olunmasını təmin edir.

İşğaldan sonra Ağdamda geniş tikinti və bərpa işləri aparılır. Şəhərdə yeni yaşayış binaları, məktəblər, körpələr evi, yollar və infrastruktur layihələri icra olunur. Hazırda Sarıcalı və Kəngərli kəndlərində birinci mərhələ bərpa işləri başa çatmaq üzrədir, digər məhəllələrdə isə tikinti davam edir. Ağdamın “Ağıllı Şəhər” konsepsiyası onun iqtisadi və mədəni mərkəzə çevrilməsini təmin edir.

Prezident İlham Əliyevin və birinci xanım Mehriban Əliyevanın Ağdama səfərləri zamanı bərpa işlərinin başlanğıcı elan edilmiş, sənaye parkları, məktəblər, mehmanxanalar və sosial obyektlərin təməli qoyulmuşdur. 2022-ci ildəki səfərlərdə isə açılış və təməlqoyma mərasimləri keçirilmiş, şəhərin bərpası sürətləndirilib. Bu layihələr Ağdamın həm iqtisadi, həm də mədəni baxımdan yenidən inkişaf etməsinə imkan yaradır.

Ağdamın bərpası yalnız fiziki tikinti ilə məhdudlaşmır, həm də şəhərin mədəni və sosial həyatını bərpa edir. Muğam Mərkəzi, Zəfər Muzeyi, İşğal Muzeyi və İmarət Kompleksi sakinlərin və ziyarətçilərin istifadəsinə verilir. Prezident İlham Əliyevin rəhbərliyi ilə həyata keçirilən bu layihələr, Ağdamın Azərbaycanın inkişaf etmiş, müasir şəhərlərindən biri kimi formalaşmasını təmin edir və Böyük Qayıdış proqramının uğurla həyata keçirildiyini göstərir.

Səmayə Əliyeva

YAP Şuşa rayon təşkilatının fəal üzvü