Prezident İlham Əliyevin Özbəkistanın aparıcı media qurumuna verdiyi müsahibə Azərbaycan–Özbəkistan əlaqələrinin hazırkı mərhələdə strateji dərinliyə malik olduğunu bir daha nümayiş etdirdi. Dövlət başçısının söylədikləri bu əməkdaşlığın yalnız bugünkü vəziyyətini deyil, həm də gələcək inkişaf perspektivlərini aydın şəkildə ortaya qoyur. Bu müsahibə göstərdi ki, iki ölkə arasında qurulan tərəfdaşlıq türk dünyasının birliyinə verilən dəyərin ən parlaq nümunələrindən biridir.

Azərbaycan və Mərkəzi Asiya ölkələri arasında möhkəm tarixi bağlar, ortaq dil, mədəniyyət və dövlətçilik ənənələri bu gün müasir geopolitik reallıqlarla birləşərək inkişaf strategiyasının əsasını təşkil edir. Xəzər dənizinin yaratdığı kommunikasiya imkanları, nəqliyyat dəhlizlərinin genişlənməsi və artan siyasi dialoq bu əməkdaşlığın sistemli şəkildə gücləndirildiyini göstərir. Azərbaycanın Mərkəzi Asiya Dövlət Başçılarının Məşvərət görüşlərində nümayiş etdirdiyi aktiv və prinsipial mövqe bu istiqamətdə atılan addımların ardıcıl olduğunu sübut edir.

Özbəkistanla münasibətlər isə bu çərçivənin ən dinamik inkişaf edən hissəsidir. Hər iki ölkənin prezidentləri arasında mövcud olan qarşılıqlı inam və şəxsi münasibətlər əməkdaşlığın daha operativ və nəticəyönlü şəkildə aparılmasına şərait yaradır. Qarabağın bərpasında Özbəkistanın göstərdiyi dəstək, mədəni-humanitar layihələrin artması və mühüm sosial obyektlərin inşası bu qardaşlığın dərinliyini nümayiş etdirir. Eyni zamanda, iki dövlət tərəfindən imzalanmış sənədlər və həyata keçirilən çoxsaylı iqtisadi layihələr münasibətlərin institusional səviyyədə də güclü olduğunu təsdiqləyir.

İqtisadi və logistika sahəsindəki inkişaf xüsusilə diqqət çəkir. 2025-ci ilin doqquz ayında ticarət dövriyyəsinin rekord səviyyədə artması bu istiqamətdə atılan addımların real nəticələr verdiyini göstərir. Orta Dəhlizin genişləndirilməsi, enerji sahəsində əməkdaşlıq, sənaye və kənd təsərrüfatı layihələri əlaqələrin strateji məzmununu daha da artırır. Mədəniyyət sahəsində keçirilən tədbirlər, park və meydanların yaradılması, habelə 2027-ci ildə U-20 Dünya Çempionatının birgə təşkili isə xalqlar arasında birlik və dostluğun davamlı olduğunu təsdiq edir. Bütün bunlar Azərbaycan–Özbəkistan münasibətlərinin türk dünyasında nümunəvi inteqrasiya modeli kimi ön plana çıxdığını göstərir.

Rəşad Rəsulov

YAP Şuşa rayon təşkilatının fəal üzvü